M’lung k’she yäk Ca Nu Pa Gui-ung Gok Lo Hnging Ca Kat Nak Gui
Na pa päng cuh ak’hngät m’lung k’she hloi, m’lung än hloi ca kia ci. Nu pa gui cuh m’lung-ah bawng bai nak, kyä-ah nat nak, yai ca bawng bai nak nak gui cuh hnguh ling vai-ah kia ci. Cunte im k’kyong-ah m’lung k’de hlo hliik ca ak’hngüp täi-ah akya lo-ung hta k’hmo gui-ah m’lung ngaih k’tha lam täng lah ng’khot ng’gei tu thei nak gui cuh m’di hnging ca kia ci.
K’hmo hta gui cuh ngami-ah ami m’lung ng’ngaih gui ak’cum-ah kä pyein tu lang pang u neh phih ami pei-ah kah k’aw gui lei cuh avan m’cun hnging ci gui-ah kia ci. Ak’cum-ah ng’plah ng’tang, ng’gen ng’am, k’aw k’se, m’kyüh m’kyok nak gui lah tuk thah nak gui cuh ami bui awt lo-ung, kä cun-ung cun gui-ah hngu-ah ami ng’vai lo-ah akia-ung ami m’lung k’kyong-ah cun gui cuh kho k’sho shäm ci gui-ah kia ci.
M’lung k’se hloi ci-ah nu p gui-ah phäh hta k’hmo gui-ung gok hnging ca kat nak gui.
- Kyüh Nak Lah Ng’ä Nak
M’lung k’se hloi ci-ah nu pa gui-awn atäng-ah om lo ca k’hmo ha gui cuh kyü kyok hloi ci gui-ah kia ci. Kat nak ami bi vai, ami nu pa gui-ah k’se k’dam nak vai gui kyü kyawk u neh am’shah k’hmo hta gui cuh ami nu pa gui-ah im pang hngo üp äi nak kä om ca ng’ngai lo ci gui.
- Mät noh mät ng’khak nak k’tha a kyen nak
Ng’plah ng’tang k’se k’dam nak, kat nak m’hluh neh gen k’se nak laih laih-ah k’hmo cuh amät noh amät i ka mong ca ng’ngaih nak hlak ci. Ami mät noh ami mät cuh kei kä hmat ci, kei i kä ni ci, kei nak m’hngi yei nak ci u kä om ci ci neh ng’ngai lo ci gui.
- M’lung ngaih-ah hlat lo Nak
K’hmo hta gui cuh k’se k’dam nak gui cuh ak’cum-ah ami ng’yak lo-ah akia-ung ami m’lung cuh khai lo ci gui. Nu pa gui cuh m’lung üp hleih ng’tung yi nak tu-ah kä ng’ngai lo ba u neh ami m’lung k’kyong-ah om ca ami pyein tu hlü gui lah ami bui awt-ah vuuk nak kat nak gui cuh shung shep neh thup thawng lo ci gui.
- Ng’gen Am Nak vai täng-ah om ip lo Nak
K’hmo gui cuh ami hnguh-ah täng-ah ng’thei ng’tham tu ci gui. M’lung se hloi ci-ah nu pa gui-ah vuuk kat nak ami hnguh lo-ung m’lung se nak ng’plah ng’tang nak ng’hawh ng’shak nak gui cuh m’cha m’lang nak gui-ah hnguh lo hnging ci gui-ah kia ci.
- M’lung k’tha ang’kyak nak lah thüi hlei nak
Am’shah k’hmo hta gui cuh ami m’lung kyong-ah k’khai-ah k’khui neh di ci phih om ca kia ci. Im k’kyong-ah k’aw k’se, ng’plah ng’tang nak gui om hleih ang’thup nak-ah u-ah kä hnguh-ah kyah nak, hngu k’poih nak, yei kyai nak gui amaih nak, k’hli hngu-ah kä ng’dang ya tu ba hlü-ah m’lung k’tha-ah ng’chiip nak gui phih om hnging ca kia ci.
