K’hmo lah Phone

A yaan lei k’hmo hta gui cuh ami ng’shong-ung vuun vai u neh ng’gü ng’lah u neh ng’hta ng’ko u neh om man ci gui.

     Cu ta kia hleih Phone gui om lo neh ngami-ah ng’gü ng’lah nak vai, ei ei nak vai, ih nak vai gui cuh Phone noh gut lo gui ci. Phone gui cuh k’hlang lah k’hlang-ah om ci gui noh ng’thu ng’hta nak vai, ng’hnguh ng’hmat nak vai-ah mang-ung nit u hnga te ci. Internet gui phih om lo hleih ni tu k’cang ci te-ah mo. K’hmo gui cuh acun bäng bäng mang neh ami kia lo-ung phih kä ni lo ba ci.

      Game gui püi mä om lo neh k’hmo gui cuh acun gui-awn mü k’hngüp luum lo ci gui. Cun gui ami ng’gü ng’lah cuh a cun gui pyang ci gui noh ngui ghui gui ami gah vai-ah ami pyan-ah kia neh ngami vah ng’büh ng’mang lo lei lei ci gui.

     Mi hta k’hmo gui kavai phäh cuh phone laih laih ami teng lo-ung ami ng’ngah tüh hnguh hmat nak tu vai-ah lu k’chawk cun phih kyen lo neh ng’thei ng’tham nak-ung phih ng’hngän lo hnging ci gui-ah kia ci. Pyang ge ci gui noh phih hnguh hmat nak vai-ah tah m’lung-ah yei tu vai bäng teng gen neh ami pyan-ah kia ci.

     K’hmo hta gui phone laih laih ami teng lo-ung ih nak kyen lo neh ami mät-ah mät noh mät ng’ngaih äp nak gui cun phih kyen lo neh m’lung-ah ng’chüih ghaam nak cun phih maih lo hnging ca kia ci.

    Phone cuh kä mi mang tu cung phih kä mi ng’pha tub a khai-ah kia ci. Caw kia hleih Phone phih mang neh  ih  nak, ei nak, ng’gü ng’lah nak gui-ah a ching gui cun phih mi k’pai m’yah tu peit gui thei vai cuh hlü lo ci.

  Mi hta k’hmo gui ami mät noh ami mät ak’khak-ah ng’ngaih nak, hti ng’ling nak lah yum äp nak lam täng-ah phih ami yo yat tu, ami ng’cu ng’dawn tu hnging vai-ah mikmi nu pa gui noh mi pei-ah ami om yah ge-ung mi m’thei m’thang tu gui vai hlü lo ci.  

   K’hmo k’tho yah gui cuh Internet-ung ka noh ami hnguh hmat ng’thei ng’tham tu vai gui phih da ci. A cun-ah hlo-ah i kä gah nak vai a ching m’di nak mät noh mät ploh nak hnging gui cun phih ak’da om ci.

   Caw kia hleih k’chim tumat vai hlü-ah ni bä khai-ah mang neh kä ng’ploh-ein nak vai-ah mang tu thei khai gui-ah m’hting m’hlei vai cun phih hlü ci.