Ngui Phih K’pam Cai Ci-ah Im-ung Kä Om Hnging Ci
K’chang ak’da pi noh ngui shui nak gui, ngui m’ih neh hlum m’lei nak gui, ngui a k’da gah nak hnging vai gui cuh k’tha na neh shui lei ci gui.
I kia hleih ngui cuh kut-ung käng ng’tang-ang? Ci neh ng’thu man ci gui phih om man ci gui. Cun gui cuh gah-ah ngui akyen-ah phäh bäng-ah kä kia ci.
K’kyong khui-ung ngui kä ng’tang cuh
- Im k’kyong-ah k’pam m’cai k’aw m’lei nak
- M’lung k’kyong-ah ng’lot neh ng’kyah ci-ah ng’ngah tüh nak
- M’gawng-ung lut lo ca ng’plah ng’tang nak gui-ah phäh phih kia hnigng ci.
Ngui cuh k’pam cai ci-ah im-ung kä om tu hnging ci ami ci cuh mi ng’ngah tüh shüm ko.
Ngui cein phih k’chang tumat vai hlü-ah mi hei ng’ngai lo shüm ko. A ni phih dim kyäp ca hngün, im-ung vah om tu hlü khai-ah kä kia ni-ang?
Ng’chu ng’la goi ak’cum-ah ng’vawk ng’gen ci goi, ng’u ng’sheih nak gui,ng’hawh ng’shak ng’gen am nak gui om ca im-ung yei kyai nak hngo kä om hlü ca im-ung ngui cun phih kä om tu hlü khai-ah kä kya ni-ang?
K’pam m’cai ci-ah k’aw ci cuh k’pung-ah ka noh ng’yaak vai-ah sha long ca k’aw bäng kä kia neh
Kei i kä bi thei ci, i kä mong ci, ka ghün om nak tuk ä nit u ci, bi loh gah tang phih kä ng’hloi ci, ci neh m’lung k’kyong-ah gui cun phih k’pam cai ci-ah k’aw-ah kia ci.
Kä yei nak, ng’u ng’sheih nak, kä yei nak gui-awn be ca m’lung noh cuh ak’ni gui cuh kä hngu ba hnging ca kia ci. Cun yah-ung ngui ghui cuh shui neh gah-ung phih kut-ung kä ng’tang hnging khai-ah kia ci. Ngui shui nak hnging-ah k’tha gui cuh ng’thei ng’tham hnguh hmat nak bäng-ah kä kia ci. Dim gei ca m’lung, ni nak hmat thei ca m’shin, thing ling ca ghün om nak gui cun phih hlü ci.
Im k’kyong-ah hngip hngäi ca ng’thu ng’hta nak hmat nak thei gui-awn be ca k’kyong khui, van cuh shüm hmat ba thei ca m’lung-awn teng lo hnging-ah akia-ung kyong khui ghün om nak cuh ng’thong ng’hlat lo khai-ah kia ci. Ngui noh cuh dim gei nak kä m’thong hnging ca kia ci. Cunte dim gei nak om ca hngün-ung lei ngui phih om tu hnging ca kia ci. Cun-ah kia hleih ngui ghui lam täng ng’yäk ng’chan hlü-ung ngui-ah hngu-ah kä läk vai. Mät-ah k’kyong khui k’kyong-ah k’pam cai nak gui cuh m’kyen cang vai. M’lung k’kyong-ah kah ng’ling neh ng’kyah ci-ah ng’ngah tüh nak k’she gui m’kyeim cang vai.
Dim kyäp nak a gok lo-ung ngui ghui gui lah ni bä nak gui cuh ng’shün hleih gok lo khai.
