Germany K’taigü Bawi Gui-ah Shan Vatican Noh a k’hleh
Miksa gün ap nak-ung yumtu ng’bum k’chang gui düt noh (Homily) ng’thu k’ni cuh kä shä tu hnging khai gui ci neh ng’thu khän.
Vertican city: June 23.2026
Germany k’taigü Bawi ng’bum gui noh miksa gän ap yah-ung (Homily) ng’thu k’ni shä nak cuh yumtu k’chang gui, k’hngumi k’pami gui düt noh ami shä tu hnging vai-ah ng’thu cuh shaang u hleih Vertican noh cun gui cuh kä yum-ah mong cuh ng’thu khän ci. Yum nak-awn ng’pak hleih m’thei m’thang nak hngün ( Discastery for the Doctrine of the Faith) lah Khanpughü shum chuk nak lah Sacramentu gui-awn ng’pak ca hngün (Discastery for Divine Worship and the Discipline of the Sacraments) noh Germany k’taigü bawi gui-am ami m’chäh-ah ca-ung “ Miksa gän ap nak-ung shä-ah ng’thu k’ni (Homily) cuh k’taigü Bawi gui, K’taigü Mang (or) k’taigü chem gui-ah hlo-ah yum äp nak-ung bi lo ci gui-awn ng’pak neh chin pi ca mong gui cuh lät neh m’thei m’kan ba gui ci.”
Vatican-ah m’cha m’lang nak-ung
Ng’thu k’ni ( Homily) cuh ng’thu k’ni k’chei tän nak gui cuh yum nak lah m’thei m’thang nak, ak’khang-awn shum chuk nak-ung ak’tung pi-ah hlü ci-ah kia neh Canon Law lah Catholic-ah khäng htek ca thum gui-ah ci-ah cun-ah bi loh ma mong gui cuh yumtu k’chang gui düt-am k’plawn neh ap gui neh kä gah-ah mong gui cuh m’dang pe gui ci gui.
Cung phih Vatican noh yumtu k’chang gui-ah bi loh tu chin gui cuh teng pe neh yum nak ng’bäi nak gui, yumtu ng’bum a yat lo vai ma mong gui, m’thei m’thang ng’thu shä nak gui lah shuh shan k’taigä nak gui-ung tot lo neh ng’cu ng’dawn tu hnging ci-ah mong cuh ng’dang khai-ah k’hmuh tu ba gui ci.
