Khãnpùghí lah Ngùi.
A û nawh phih báwi k’hngih kavai, kä bi hnging khai.Tumat ú neh tumat m’hni khai.Tumat äp neh tumat kä tä khai. Nangmí, Khãnpùghí lah k’chàng-ah bi m’tói neh kä nami bi hnging khai.
Cun-ah kia hleih nami hngùn-ah phäh-ah, a i èi vai, nami käü-ah phäh-ah, a i hlui vai ci neh kä ng’ä èin vä. Èi vai-atah hngùn kä bä tu bà ci ang? Hlui-hlak-atah käü kä bä k’tu bà ci ang? Khãn-zàwng ’khá gùi teng vä, kä géit kó, kä khäm-khawi, ’khèi ung phih kä ng’htîn kó ci gùi. Cun tu pãng-ah phih, Khãnmòpí-ah om ci-ah nami Pá nawh m’bei gùi ci. Cun-ah ’khá gùi-atah, nami bä tu bà ci-ah kä kia ci ang? Nangmi ung a u nawh a mät nawh a mät, dòng-ah ng’säi lo khai-ah, ng’ngah-tüh hnging ci ang? Hlui-hlak-ah, a i-ah kia hleih nami ng’ä ci ang? Bung-hngù chei pai gùi, a i-ah ami bä cuh, ng’ngaih-tüh vä. Bi kä bi ci gùi. Kä sún tah ci gùi. Cung-phih, Nangmí àm ka piéin cuh a kia bä ci-ah, Solomon mät nawh phih, sin gùi ung-kah, a pãi tumat htá hlok-ah phih, kä hlùi hlak ci. Tuh-ngói ghing neh a ngói ung mei ung k’htop vai-ah m’ghó hngo, cun-ah a m’hlui ung nangmi àm, cun-ahtah bä pi hleih, kä ning ci pe gùi neh kia khai ang? Zùmnák kèn ci-ah k’chàng gùi-aw. Cun-ah kia hleih, a i, èi vai, a i áwk vai, ci neh kä ng’ä cäi èin vä. Cun gùi cuh, kä zùm ci gùi nawh sùi ci gùi. A i-ah kia hleih ci ung cun gùi, nangmí ung hlü ci cuh nami Pá nawh hmat ci. Cun-ah kia hleih, Khãnpùghí ghin khaw lah a ng’súng-ah om vai cuh, mà neh sùi vä. A cun-ung, cun gùi ning pe bà gùi mä khai. Cun-ah kia hleih, ngói ung kavai kä ng’ä cäi eìn vä. A i-ah kia hleih ci ung a ngói ung a mät nawh a mät kavai ng’ä khai. K’Hngüp ät-ah, zái-cãnák cuh a cu k’hngüp-ah phäh-ah ng’büh-èi ci.
