Jesu k’hmó, Jerusalem khàw im-ah a k’poih ghüt-ah màwng.
Kum-täì hleih Paschal-ah phäh-ah, a Nú Pá goi cuh Jerulem-ah hteit hti man ci goi. Jesu, a khaw kum gha-leigoi-ah kia lo hleih Paschal thungman-ah, a Nú Pá mah-ah, Jerusalem-ah hang kài te ci gùi. A ng’päng vai àm, a Nú Pá goi hteit-èi bà ni hleih k’Pámihtá Jesu cuh Jerusalem ung om ghüt ci. Cun-ah a om ghüt cuh a nú lah pá nawh kä hmat te ci goi. Ngani nawh ani cuh ng’gui ci gùi ung ng’läk tu khai-ah, ng’ngài ni neh k’hngüp ät lüng, lam hteit cang ni nehtah ani pó-’chàng ng’khawt ng’et gùi ung sùi bà ci goi. Kä hnguh lo bà ni neh ani, ani sui bà vai-ah phäh-ah, Jerusalem-ah ng’hlat bà ci goi.
K’Hngüp thùm-ah kia lo hleih Khaw Im-’kiong-ah, Saza ng’vái gùi-ah ng’lung-ah ngoh tu neh ng’ngài gùi neh-lah, a mät nawh phih, ng’si tu bà gùi hleih hnguh lo bà ci goi. Ani-ah piéin ng’zák tu ci gùi phung nawh phih, ani-ah hnguh hmat lah, a m’sàng bà gùi hti-a phäh-ah, a ng’htéi-ah cäí ci gùi. Ani cuh, hnguh lo bà ni neh a ng’htéi-ah cäi tu ni nehtah a nú nawh “Ka Htá aw, a i-ah kia hleih keini, sin-ah na nà ci goi ci ang? Teng-ä! Na Pá lah kei thüi ng’ä aih neh kani ning sùi bà ci,” ci hleih, Ani nawh phih, “A i vai-ah nani nà sùi bà te ci ang? Ka Pá-ah màwng lam ka bi vai cuh, kä nani hmat tu ci ang?” ci neh a m’sàng bà, Jesu-ah m’sàng nák bà, sin-ah k’chü cuh a k’ní-ah kä k’síng ci goi.
Jesu, a ng’thuh-ah a omnák-ah khaw-kum gùi.
Cun kon-ah, Jesu nawh ngani mah-ah kium lo bà neh Nazareth pigò-ah lo bà nehtah ani béit phung ng’ngài neh om te ci. A nú nawh phih, sin-ah màwng gùi avan cuh a m’lung-àm k’üp düit man ci. Jesu cun phih, Khãnpùghí lah k’chàng-ah mà-ah ng’vái lo neh hnguh hmatnák ni, k’tha gui ni, Khãnpùghí-ah ng’khainák gùi-awn, bé lo lei lei ci.
