RVA K’Hngüp(RVA Day)cuh K’Chò Service no June k’cha 9th ung bi htük ci.

RVA ung K’Chò Ng’thu on bi nak cuh kum 18 lo tu pang lang hleih phih RVA K’hngüp cuh tukbäih bäng bi ci gui ah kya ci. Cun ah pòi cuh Htum K’Cho Kho,Lung K’She Parish ung K’taigü Mang Khem Boi Phaya Om She noh khongmang hleih ami bi nak ung Boi Phaya Kyüi Kkhui Om,Boi Phaya Kho Gei Ghung,Boi Phaya Ngling Mong,Boiphaya Näng K’shui lah St.Francis lah St.Theresa Mamah gui on atäng ah pahta kchang 600 hlok noh Missa gän äp ci gui.
Acun ung K’taigü khém Boi Om She noh RVA ah mong cuh htahtana bi k’o mhlonnak on bi ah mòng i hngo kcha k’cha a om lo lah i hlok ah a ni ah moong mthein tu gui ci.
Missa ng’phleh lo hleih Boi Phaya Kkhui Om noh RVA cuh Boi Jesu noh a pyein man ah “Kei ah moong cuh im kcih kkhan ah kai neh pyein lo khai gui’ ci neh a pyein cuh ngchüp lo ci.
Aihli hta vai hlü ah mopi ah hngan hnguh ah ‘kyô-tuh’ noh avan yu pha lo netah avan ah kkoh ah phone gui ung a hoi gok ung phih. hnguh ngyák tu vai ah a bi cuh akya ah bä ciah kya hleih a u noh phih RVA a ngngaih a teng tu vai ah pyein ci.
Cun kon ah RVA khong Boi Ngling Mong noh RVA cuh a i ah hlo ang?U gui noh a i hngo kcha ah ami bi Power point on khnguh gui neh akpüh akkheh ah mthein tu gui yop hleih RVA K’Hngŭüp cuh khngüp nglung khngi mkhin 12 ung shüm hmatnak ng’äi on phleih ci gui.
Missa gän ap nak ngphleh hleih poi ung lo tu ci gui cuh RVA ung bi tu ci gui noh khngüp êi mbei gui hleih RVA K’Hngüp binak ah poi cuh ngpäng ci.