Jesu k’tài-gü ci.
Sin a piéin kon-ah, Jesu nawh, ’khãn-ah hang k’dáng neh a piéin cuh, “Pá aw, ka ma lam zä lo pi ci. Na htá nawh a ning bä tháng hlak vai-ah, Na htá cuh, bä tháng hlak-ä. Nà m’säm gùi-ah k’chàng phùng àm, ghin ng’däihnák a péit vai-ah a hngùn k’ghing gùi phùng a m’säm-a hlo bä-ah néi. Sin-ah ghin ng’däihnák ci cuh Khãnpùghí a k’càng, nang bäng lah, Na tüih lo-ah Jesu Christù ami hmat vai-ah néi kia ci. Nà bi hlak gùi phùng ka pi pängnák-awn, khaw m’dek ’khãn-ah ka ning bä tháng hlak pi ci. Pá aw, khàw m’dek kä om pha ung nà péit-ah kei ung om man ci-ah bänák mät awn, Tuh-bäih phih na bä tháng bà hlak-ä. Khaw m’dek ung-kah la neh, na nà m’säm gùi àm, na ng’ming ka m’thein gùi pi ci. Ngami cuh nang ka-ah kia hleih kei àm nà m’säm gùi ci. Ka k’chü cuh, ng’ngài pi ci gùi. Nà péit gùi phùng cuh na mät-a kah-ah a kia cuh hmat pi ci gùi. A i-ah kia hleih ci ung na nà m’chäh-ah k’chü gùi cuh ka k’sòn bà pi ci. Ngamí nawh dàw u neh nang ung-kah ka lo cuh, hmat u neh nà tüih lo-ah a kia cuh, zùm pi ci gùi. Ngamí kavai-ah ka sàng ci. Khaw m’dek kavai-ah kä ka sàng ci. Nà péit gùi kavai-ah ka sàng ci. Ngami cuh nang-a kah-ah kia hleih néi. Kei-ka cuh nang kah, nang-ka cuh kei-kah ah kia ci. Cun gùi ung ka bä tháng ci. Khaw m’dek k’khãn-ah kä ka om so khai. Ngamí tah khaw m’dek ’khãn-ah om so khai gùi. Nehtah kei cuh, nang-ah ka lo khai. Htí-théing ci-ah Pá aw, ni ät-a hlo-ah, na nà m’säm gùi ami ät tu vai-ah, na ng’ming ung m’ät gùi-ä.
