Los Andes mânggo ung ka Bä ciah Teresa ah ghünlu a mong
Los Andes mânggo ung ka Bä ciah Teresa cu Christu kum 1900 ung ng’tüi ciah kya ci. Bä ciah k’chang tumat no a hei bä ciah k’chang ah khan ah a om k’ih läklam gui awn k’bui hnging ci ci cu Los Andes mânggo ung ka Bä ciah Teresa no m’dang ciah kya ci. A ni cu Lisieux Mânggo ung ka Bä ciah Theresa no a guk ah Story of a soul ci-ah a mong cu a k’khei kon ah Mamah tumat ah kya lo tu hlü ciah a m’lung k’nga om lo ciah kya ci. A ni no a k’hngüptäi a m’lung k’nga ung ng’ngahtüh gui a guk then nak ung “ Kei cu Khanpughi no a na sham ah ka kya ci. A ni no kei na tüi pyang ci. Khanpughi cu kei ah a k’htük pi lah a k’hngu pi a ng’päng nak ah ka kya ci. Kei cu a ni no a van a na sham a na mang ah ka kya vai phäh ah kei no Khanpughi ah ng’yak hlü ah hlo ah bi ka bi khai. Khanpughi cu kei ah Pa tumat ah kya ne Ka ghünlu pum a ni no hmat tu lang hleih a ni am a í ah kya hleih kä ka gänap peit tak hnging vai ang? Tuh k’bäih ung ka no leng ne Nang Khanpughi ah kutu ng ka mät no ka mät ka ning gän ap ci nei. Nang Boi no nang ng’yak hlü ah hlo ah kei na mang ä” ci ne a guk ah kya ci. A ni cu Avilla mânggo ung ka Theresa lah Shing k’thum Khanpughi tumat yum m’hngi ciah Bä ciah ah Elizabeth ah a ni ghün lu a mong a k’khei kon ah Carmelite Mamah ng’htoi ung a luh tu hlü cu khäng htek lo pi hti ciah kya ci. A ni cu a kho 19 ung Chile Los Andes ung om ciah Carmelite Mamah ng’htoi ung lut tu ciah kya ci. A ni cu a ghünlu lang hta ciah pyangtham ne läk lam vai gui a k’ni ah m’htei ne läk ne k’taigü ne om ne ta a k’hngu ah goi lo ne Christu kum 2000 ung shi ciah kya ci.
