Bä ciah Julie Billiart ah ghünlu a mong

Bä ciah Julie Billiart cu Christu kum 1751 ung Pyinhtit kho Picardy ung ng’tüi ciah kya ci. A nu pa k’tu cu yoituk nak hta gui lah geit ko ne a mi ghünlu ung a k’ni ah k’tha na ci gui ah kya ci. Christu kum 1767 ung ngami ah k’kyawng khui ung yaica nak gui buiawt ci gui ah kya ci. Julie Billiart cu a k’kyawng khui ung om ci gui a nu pa k’tu a k’ni ah a gunhtot nak gui hnging vai ah k’tha na ne bi bi ciah kya ci. A ni cu a k’teng ah a kut kho ng’gung hleih a ih nak ah k’khan ah a ng’yän yah ung leng ne a ni ah Khanpughi ah mong lam a bi nak vai ah lam cu leng ne ng’dang ciah kya ci. A ni cu Saya von tumat ah m’htei m’hta nak lah m’tuim’hleih nak gah ciah kya ci. Cun tu pang ah phih a ni ah m’neh m’oh nak cu ka lo lei lei ciah kya ci. A kho kum 30 be lo hleih a m’neh m’oh nak gui ka lo pihti ne a kut kho gui phih kä k’hngün bah lot ciah kya lo tu lang pang hleih phih a ni ah Christian ah a kya nak cu m’dang khai ah a m’lung phukpit ciah kya ci. K’chang a k’dâ cu a ni ah om nak ah hteit ne ng’müi m’cha lam ung k’nga k’phlang nak lah lam m’shüm nak gui la ciah kya ci.

A ih nak ung ka no a k’hmo hta gui am Khanpughi mong lam gui m’thei m’thang tu gui ciah kya ci. Pyinhtit ung ng’yukah nak gui om ciah kya hleih a ni ah im ah Boiphaya gui om tu hlak gui ne mâng k’chang pakkhui gui awn a k’ni ah ng’kot ng’gei ne a mi om ah phäh ah a ni ung buiawt nak gui om lo ciah kya ci. A m’shah no a ni ah hngun dí khai ah a mi ngong hlü ah chüt ah kya lo ci. A ni ngong hlü ci gui ah k’chang gui no a kya ah m’lung k’she u ne a van ung yat khai ah a mi shui ah kya ci. Julie Billiart no a k’taigü cu “Kei no ka ning m’hngi ah Boi aw, kei ka vai ah yeikyai nak na shui peit ä. Kho m’dek ah k’khan ah kei ka om nak vai kä om ci ciah kya ci. A ni cu a kya ah a m’lung thüihleih lo ne kä ng’hta lo ba hnging ciah kya ci. A cun ah a k’sho yaica ne ta a k’hngu ah kyäp kyäp hta ah a k’o lut lo ba ciah kya ci. Dupyam ci gui ah a k’hmo hta gui ah a mi hnguh shim nak gui a mi ng’thei ng’thang nak vai lah ca m’thei khai gui ah k’hngumi hta gui no ca a mi m’thei nak hnging vai ah a mi ng’thei ng’thang nak vai ah Notre Dame a k’bum cun phhih m’düih ciah kya ci. Khokum 22 peng peng a kutkho ng’gung ah kyat e ci a k’teng ah hteihton ba thei ne a ni no a m’düih ah a ng’bum a k’ni ah a ng’phät hnging vai ah lam k’hla gui ah hteit hton ne bi lo ciah kya ci. Christu kum 1816 ung a ni cu goi lo ne a ih nak ung ka no “The Imitation of Christ” ca uk ung ka “ Nang cu shing m’kang k’tung na m’lung ah lo hleih na k’koh ung a cun ah shing m’kang k’tung no a k’däih ah na m’lung ah yeikyai nak ah ning chang khai” ci cu Mamah tumat am k’khei hlak ne a ih nak ung ka no ng’ngai ne ta shih ciah kya ci.