Bä ciah Prudentius Galindo ah ghünlu a mong
Bä ciah Prudentius Galindo cu hnguh hmat nak gui ah ca a k’dâ guk then ciah Saya tumat ah kya ne khoh tang gui awn ng’büh ng’mang ciah k’kyawngkhui ung ka no ng’tüi lo ciah kya ci. A ni cu AD 843 ung Pari mânggo a htum lah hliip lam ung om ciah Troyes ah Taigü mâng ah kya lo ciah kya ci. Prudentius Galindo cu kya lo ci gui a van cu Khanpughi no a ge ah a m’dang ah hlo ah kya lo ci ci ne a mi yum nak gui ah Khanpughi ah mong lam ng’cuh ng’vah nak ung a k’tung pi ah cum boi tu ciah kya ci. Boi Yesu cu ghü nak gah ci gui ah k’chang a k’ken gui ka vai ah phäh ah va shih ciah kya hleih k’chang a k’dâ tu ba cu a k’htük ge ah m’hteikho ah hteh vai ah kya ge ci ci ne Yahteih Gottschalk no a m’thei ah kya ci. A cun ah m’htei m’thang nak cu vang ah vei a ng’hloi vai düit ah ciah m’thei m’thang nak ah k’chang a k’dâ no ng’ngai lo u ne kä yum lo ci gui ah kya ci.
A cun ah m’thei m’thang cu Reims mânggo ung om ciah Taigü mâng Hincmar no Yahteih Gottschalk am yumtu ng’bum ah a k’pung ah om ciah k’chang ci ne k’chang gui no a mi hmat vai ah thähla ne ta a kya ah a kalu nak ah kya ci. A cun ah a kalu nak cu kä k’bäi ciah Prudentius Galindo no Taigü Mâng Hincmar lah Taigü Mâng Augustine am ca gu ne a m’khäh goi ah kya ci. A ni cu Khanpughi ah mong lam gui m’thei m’thang hnguh hmat nak ung kä ng’shing ci gui a mi pein hlak bi loh nak ah a mi ng’bum nak Council ung a k’ni ah k’chang gui no cang lam a mi hnguh hmat hnging vai ah a k’tha pyhat ah cumboi ne pyein hla bi lo tu ciah kya ci. Prudentius Galindo cu Christu kum 861, April k’cha 6 ung goi lo ne shi ciah kya ci.
