Jesu a ghin lo bà kòn-ah, a mät nawh a mät a m’dáng bà.
Jesu läí cuh k’hngüp k’chüih ung a k’htük’hngüp khaw-’ngói-ah ghing lo bà neh khaw-’nget k’chüih a k’täm péit-ah, Maria Magdalena-ah, mà neh ng’dáng ci. Ani cuh, hteit neh Jesu awn om tu man ci gùi, thüi kiap ci gùi àm, cun-ah màwng m’thein tu gùi ci. Jesu, a ghin lo bà-ah màwng, ani nawh a hnguh-ah màwng cuh, ng’zák-u neh kä zùm ci gùi.
Cun kon-ah, ngami gùi ung-kah, ani pigò-ah hteit bà ci goi-ah, a hei goi-a phih, amüí hei awn ng’dáng ci. Sin goi nawh hteit neh a hei gùi àm m’thein tu gùi ni hleih phih, ngami nawh kä zùm ci gùi.
Cun kon-ah, a-hlu-läk gùi gha-lei-ät cuh ei ami ei zah ung Jesu ng’dáng neh ngami gùi kä mi zùm-ah phäh-ah lah, líng neh kä mi zùm hlü te-ah phäh-ah, k’hlái neh be gùi ci. Cun kon-ah, ngamí àm a piéin cuh, “Nangmi cuh khaw m’dek ’khãn púm-ah hteit u neh Khãnpùghí-ah a tüi k’hmüt gùi avan àm, ghin-phiónnák vai-ah màwng lam, m’thein tu gùi vä. Zùm neh, m’sinák gah tu ci cuh phiónnák gah khai. Kä zùm tu ci gùi cuh, m’cha m’làngnák gah khai gùi. Zùm äp tu ci-ah k’chàng gùi ung om tu hngá khai-ah, cäi-catnák vai-ah màwng gùi cuh: kei-ah ng’mìng awn, khaw-’nget k’täm m’chüt khai gùi. k’Chü a hei hei-awn, Khãnpùghí m’tam lo khai gùi.
