Sihnák-ung-kah ghing bà ci.
Kiün k’hngüp-ah a ngói ung k’hngüp k‘chüih-ung-kah, a k’htük-k’hngüp, khaw a thaih lo ghep ghep zah ung Maria Magdalena lah a hei Maria nawh k’phuh nák cuh, teng vai neh hteit lo te ci goi. A cun zah ung khàw m’dek thüng k’piüt ci. I-ah kia hleih ci ung Khãnpùghí-ah ng’sä khãnhtapup cuh, Khãnmòpí-a kah kium lo neh m’kot khainák-ah lung nú cuh, a k’pèi-ah m’hlé nehtah m’sän neh a’khãn-ah ngoh ci. Ani-ah hmai cuh, khaw-láiläp vai hlü-ah piang ci. A hluihlak phih k’hlüìtak vai hlü-ah bók ci. Ngäng ci-ah gà-káp gùi phih, Khãnhtapup hnguh u neh si ghep ghep neh kiü ci gùi. Khãnhtapup nawh k’hngumi goi àm piéin neh, “Kä kiü-èin nä.” Sing-m’kang k’tung ung chên neh ami ngáwn-ah Jesu nani sùi ci-ah, ka hmat ci néi. Si zàh-ah kä om bà ci. A mät-ah piéin te-a hlo-ah, ghing bà pi ci. Lo neh ami m’sän nák te teng tu nä. Cun kon-ah, a k’zä-ah hteit neh, a-hlu-läk gùi àm, sihnák-ung-kah, a ghin lo bà-a màwng, m’thein gùi nä. Namí mà-ah, Galilee khàw-ah Báwi cuh, hteit khai. Cun-ah khàw ung Báwi cuh, nami hnguh khai, ka ning m’thein goi néi” ci ci. Ngani cuh, kiüh-ah phih, kiü-ni neh zèi-ah phih zèi nineh k’phuh hngün-a kah, a k’tén-ah hteit neh a-hlu-läk gùi àm, a ghin bà-a màwng, ani m’thein tu gùi vai-ah phäh-ah dáwng ci goi. A cu vai àm, Jesu nawh ngami cuh, hnguh gùi neh “Ak’dim a ’kiäp-ah om vä,” ci neh ngami àm piéin ci. Ngami nawh phih, k’et u neh a khaw k’pang neh Jesu cuh, sum-chuk ci gùi. Cun kon-ah, Jesu nawh, “Kä kiü-èin vä; ka nàü gùi, Galilee khàw-ah ami hteh vai-ah piéin vä. A cun zah-ah, na hnguh khai gùi,” ci neh piéin ci.
Gà-káp gùi-ah k’chü m’khá.
Ngami ami hteh kon-ah, ngäng ci gùi-ah gà-káp a m’sah cuh, mãng-gònú-ah hteit bà u neh, kia ci gùi phung cuh, k’tài-gü ng’vái gùi àm piéin bà ci gùi. Ngami gùi phih, k’chàng ng’vái gùi awn ng’bum neh, nìna u nehtah gà-káp gùi àm, ngùi a k’dá pe u neh, “Mü-ah, keimí kami ih zah ung a-hlu-läk gùi lo u neh ani, ami m’gúk,” ci neh nami piéin vai. Cun -ah a màwng, Pilatu mãng nawh a ng’zák-ung, nangmí kä ning gen èin gùi khai-ah, keimí nawh kami piéin-èi khai,” ci neh m’cäi gùi ci gùi. Ngami nawh phih, ngùi la-u nehtah ami m’cäi gùi bä bä-ah ci ci gùi. Cun-ah k’chü cuh, a tuh-güt-ah chüt, Judeu k’chàng gùi ung zat zop ci.
