Bethany-ah sing tui ng’ùi awn ami hlup-ah màwng.

  Pascha a omnák vai, k’hngüp chuk a m’hni bà zah ung si hleih a m’ghin bà te-ah, Lazarus-ah pìgò Bethany-ah, Jesu gok ci. A cu zah-ah, Báwi kavai, mü-ei piàng ci gùi. Martha cuh, sàwng-cik ci. Lazarus cuh Báwi awn a ät-ah èi vai neh ngoh tu ghom ci. Cun kon-ah, Maria nawh, nardi-tui ng’ùi k’sàng ät lo püi neh Jesu-ah khaw hlup nehtah a lu-mu awn ghuit péit hleih im ’kiàwng púm-ah cun-ah nardi-tui-ah ng’ùi ci. Cun ung a-hlu-läk gùi-ung-kah, Báwi k’tun khai-ah Juda Iscãriot nawh,  “Cun-ah nardi-tui ng’ùi cuh tang-kà pit thùm-ah zòi neh dú-dàwng ci gùi àm péit ung ni phäih vai hlü,” ci ci.   Cun-ah a piéin cuh dú-dàwng ci gùi a m’gein-ah phäh-ah kä kia ci. M’Gúk èi-ah kia nehtah ng’it ung om ci gùi la hti man ci-ah kia neh a piéin.  Jesu nawh a piéin cuh, “Nawng èin-nä, ka ng’phuhnák vai-ah k’hngüp-ah phäh-ah güm hlä. Dú-dàwng ci gùi cuh, a ng’däih-ah nangmi gùi awn om ci gùi. Kei cuh, cun-ah kä ka om tu khai.

Cu zah-ah Báwi a om, Judeu gùi a k’dá nawh hmat neh Jesu-ah phäh bäng-ah kä kia ci. Si ci gùi-ung-kah a m’ghin bà-ah Lazarus phih ami hnguh tu vai-ah lo ci gùi.  K’Tài-gü ng’vái gùi nawh Lazarus phih ngáwn vai-ah piéin kiùm ci gùi.  A i ah kia hleih ci ung sin-ah phäh-ah Judeu a k’dá nawh ngamí, hngú na gùi neh Jesu cuh, zùm ci gùi.