Guadalupe ng’lami hta Maria ah a mong

Guadalupe ng’lami hta Maria cu A merian khaw ah a ming thang ne a ni u pa ci gui a u phih gunghtot m’htei m’hta ci ah kya hleih a mi um nai m’hlung m’tai kya ci.

Christu kum 1531 ung Maxico Ghunkhaw, Guadalupe maanggo ung Nu Maria noh Tuan Diego am a mät no a mät m’dang ciah kya ci. Kyiom htang ciah December (9) hngüp khaw ngoi ung Tuan Diego cu phaya kyawng lam ah a hteh yah ung hngiphngäi hta ciah k’hngumi tumat noh k’phukha hta gui ah a mi ng’äi aw awn a täng ah Tuan Diego.. Tuan Diego.. ci ah a ming a chü cu ng’ yak ciah kya ci. Tuan Diego noh a cun ah chü k’o cu a u noh a chü hmat hlü ne vang lam ah om ciah k’päng hta  hei teng hleih, k’khawhngi vai hlü ah pyang ne a phu kyüi ciah lung k’po k’khan ah ng’düi ci ah Nu Maria hei ghuh ciah kya ci. Nu Maria noh a pyein cu “ Kei cu k’chang gui ah khan ah m’hngi ne k’chü m’gein nak, gunghtot nak lah ghun nak gui ka bi nak hnging vai ah Phaya kyawng tumat shin ah k’päng ung coh vai ka ng’ yak hlü ci” ci ne pyein Tuan Diego am pyein ciah kya ci.

 A cun a ng’yak vai lah a ten ah Taigü maang ah hteit ne a hnguh ng’yak gui a van m’thein hleih Taigü maang noh Tuan Diego a pyein a cang ci cu kä yum hlei Tuan Diego cu Nu Maria noh a m’dang nak ah k’päng ah hteit ba ne “ Ka m’hngi ah Nu aw.. shin ah bi vai ah däm ciah mong cu a tung pi ah bi hnging khai am na mät noh na mät m’dang ne na pyein ung nga mi noh yum ne bi khai gui ah kya ci. Kei cu dudong yaica ne a I kä bi hnging khai ah k’chang k’pyam hta ah ka kya ci ci ne pyein hleih Nu Maria noh ka hta aw.. ngoi ung khawngoi htahlik ah Taigü Maang ah om nak ah hteit ba ne Kei ng’lami hta Maria noh ka ning hteh hlak ci cu na pyein ba vai ci hlei Tuan Diego noh Nu Maria  ah k’chü ng’ngai ne Taigü Maang ah om nak ah hteit ba ne m’thein ba hleih Taigü Maang noh  shin ah mong cu a cang ci ah yum nak vai Miracle tumat a m’dang vai shang ciah kya ci. A cun ah kya hleih Nu Maria noh Tuan Diego ah ma ah ng’dang lo ba ne shin ah k’päng ung na hnguh ah Hnginsi papai (Roses) gui a van ko yop ne hlui tumat awn htun ne hta Taigü Maang am na thak vai ci hleih Tuan Diego no Nu Maria ah pyein ah hlo ah bi ne Taigü Maang ah hteit ba ne k’hmu ciah kya ci. A cun ah a hmuh nak ah hnginsi papai ung Taigü Maang noh Nu Maria  cu cäicat vai ah a ng’dang lo cu hnguh ciah kya ci. A cun kon ah Taigü Maang cu Nu Maria ah k’chü ng’ ngai ne a ng’dang nak ah k’päng ung phaya kyawng tumat a coh ah kya ci. Guadalupe ng’lami hta Maria cu a cun ung ka noh a ming thang lo ne American k’chang gui ghung m’htei ciah ah a ming thang lo ciah kya ci.

Reference: Life of Saints (Written by Seminarians (Pyin Oo Lwin)