Abraham kä om pha ung kei ka om ci.

 Judeu gùi nawh phih, “Khaw-’nget nawh a ning omnák kami hmat ci. Abraham ung-kah nawh lèng neh, ce ng’sä gùi cuh si zop pi ci gùi. Nang läí nawh, kei-ah’chü ng’zak ci nawh, sih kä hnguh tu khai, ci neh piéin lo ve chü-ü.  Keimí-ah Pá Abraham a tah, na bä tu bà ci-ah kia neh-ang? Ani cuh, si pi ci. Ce ng’sä gùi phih si pi ci gùi. Na mät nawh na mät a u-cun-ah ng’ngài neh ang?” ci ci gùi.  Jesu nawh, m’sàng bà gùi neh, “Kei cuh ka lä ng’tai ung a khaw lä-ah kia khai hlü. Nami Khãnpùghí-ah nami piéin-ah, Ka Pá läí nawh, na m’hlüng m’tai ci.  Cun tu pang-ah phih, cun-ah Khãnpùghí cuh kä nami hmat ci. Kei läí nawh ka hmat ci. Ani cuh, kä ka hmat ci, ka ci vai hlü ung nangmi gùi-a hlo-ah, ka hlèhlak tu ci-ah kia khai hlü. Ani cuh ka hmat ci. Ani-ah k’chü phih ka ng’zák ci.  Nami Pá Abraham nawh a na hnguh lo vai cuh a m’lung àm äp neh, zèi tu man ci. Hnguh lo hlot neh, zèi tu ci,” ci neh piéin ci.

Judeu gùi nawh, “Nang na khaw kum hma-kip phih, kä lo phamih hleih Abraham hngo na hnguh tu pi ci ang?” ci ci gùi.  Jesu nawh, “A k’càng-ah ka piéin cuh, Abraham kä om pha gé ung kei ka om ci,” ci neh piéin ci.  Cun-ah kia chü-tah ani ami voihnák vai-ah, lung kó ci gùi. Jesu cuh, ng’chén ghüi neh khàw im ung-kah nawh hläih ci.