Kä zùm ci-ah k’chàng gùi, gen na gùi ci.
Cun kon-ah Jesu nawh, “Kei cuh, ka hteit khai. Nami na sùi lo khai. Nami mät-ah kat-ung nami si lo khai. Ka htehnák lam ung kä nami lo tu hnging khai,” ci neh ngamí àm piéin ci.
Judeu gùi nawh, “Ka htehnák lam ung kä nami lo tu hnging khai a ci ung a mät nawh a mät ngáwn vai neh mä?” ci ci gùi. Báwi nawh a m’khah cuh, “Nangmí cuh ’kã k’om-ah nami kia ci. Kei cuh k’khãn k’om-ah, ka kia ci. Nangmi cuh, m’dek k’chàng-ah, nami kia ci. Kei cuh, khaw m’dek k’chàng-ah, kä ka kia ci. Cun-ah kia hleih nami mät-ah kat ung nami si lo khai,” ci neh nangmí àm ka piéin. A i-ah kia hleih ci ung kei a u-ah ka kia, kä nami zùm ung nami mät-ah kat ung nami si lo khai.” Ngamí nawh, Báwi àm, “Nang cuh, a u ang?” ci ci gùi. Jesu nawh, “Kei u-ah ka kia cuh a k’htük gé-ah, ka ning m’thein gùi pi-ah mô. Nangmí-a màwng piéin neh ka m’cha m’làng vai a k’dá om ci. Cun tu pang-ah phih, kei na tüi lo’ci cuh, bä k’càng ci. Ani ung-kah ka ng’zák gùi cuh, khaw m’dek k’khãn-ah ka piéin bà ci,” ci neh ngamí àm piéin ci.
“Khãnpùghí-ah a màwng, Báwi nawh a piéin cuh ngamí nawh kä k’síng ci gùi. Cun-ah kia hleih Jesu nawh ngamí àm a piéin cuh, “K’Chàng-ah Htá nami tai kon-ah, a cun ah ka kia-a màwng, ka mät-ah hmat-ah a i kä ka bi-ah màwng, Pá nawh a na m’thei-a hlo bä bä-ah ka piéin-ah màwng, nami hmat lo khai. Kei na tüì lo’ci cuh kei awn a kong-ät-ah om ci. Ka mät kä na nong ci. A i-ah kia hleih ci ung a ng’zák hlü-a hlo bä bä-ah a k’cùm ah ka bi ci. Cun-ah a màwng gùi piéin hleih a k’dá nawh, Báwi zùm ci gùi.
