Htá nawh a bi-loh gùi.

“Nangmí àm a k’càng-ah ka piéin cuh Htá nawh, a i phih a mät nawh ng’düih lo püi neh kä bi hnging ci. A pá nawh bi hleih a hnguh vah,bi hnging ci. A Pá-ah bi teng neh-vah, Htá nawh phih bi ci.  A Pá nawh a Htá m’hni neh a bi phùng cuh, ani àm k’hmuh tu ci.Cun bäng-ah kä kia hleih nami cäi-cat vai-ah, sin gùi-a tah däm pí ci-ah bi-loh gùi cuh, k’hmuh lo khai.  A i-ah kia hleih ci ung Pá nawh a k’si a m’ghin bà-a hlo bä-ah, Htá nawh phih, a ng’zák hlü gùi cuh, m’ghin bà ci. A i-ah kia hleih ci ung Pá nawh a u phih kä m’cha m’làng ci. M’Cha m’làngnák phùng cuh Htá àm pe zop ci. Pá ami m’tam-a hlo-ah, avan nawh, Htá cun phih ami m’tam vai-ah phäh-ah kia ci. Htá kä m’tam ci nawh tüi lo ci-ah Pá kä m’tam hlü ci. Nangmí àm, a k’càng-ah ka piéin cuh ka k’chü ng’ngài neh na tüi lo ci zùm ci nawh, a k’cùm-ah ghinnák gah ci. M’Cha m’làngnák kä gah khai. Sihnák ung-kah, ghinnák-ah ng’plon khai.”  Jesu nawh a piéin lo cuh, “A k’càng-ah ka piéin cuh, si ci-ah k’chàng gùi nawh, Khãnpùghí-ah Htá ah k’chü k’áw cuh ng’za neh, ng’zak ci cuh ghing khai-ah, a Tuh-bäih kia lo gé ci. A i-ah kia hleih ci ung Pá Khãnpùghí nawh, a mät ung ghinnák om ci-ah kia hleih a Htá phih, a mät ung ghin tu hlak ci. Htá Khãnpùghí cuh k’chàng-ah htá-ah kia hleih m’cha m’làngnák phih kana hlak ci.  Sin-ah a màwng gùi ung kä nami cäi vai. M’Cim hngün ung-kah gùi nawh, Htá Khãnpùghí-ah k’áw cuh, ng’za neh, Ami leh lo vai-ah kia lo pi ci. A k’ní bi man te ci gùi cuh a k’cùm-ah ghinnák-ah, a k’sé bi man te ci gùi cuh m’chanák gah vai u neh ghing lo bà khai gùi.  Ka mät-ah ng’ngaih düit-ah a i phih kä ka ci hnging ci. Ka ng’zák-a hlo-ah vah ka m’cha m’làng ci. Ka m’cha m’làng cuh, càng ci. Ka mät-ah ng’zák hlü-ah kä kia neh na tüi lo ci-ah ng’zák hlü ka sùi ci.