Kiün k’hngüp, Bethesda tui k’büm pèi-ah, a k’gàw m’gái bà ci.
Cun zah ung Judeu gùi-ah thung man-ah, Pascha-ah kia lo hleih Jesu cuh Jerusalem-ah hteit ci. Jerusalem pigò ung htò m’kot pèi-ah, Hebrew k’chü awn, Bethesda ci neh ami hlui-ah, tui k’büm ng’phì tumat om ci. Cun-ah tui k’büm cuh vai-làng k’hmà nawh ’kói ci. Cun-ah vai-làng gùi ung a m’dah, a ng’chèm, a k’zùng, a k’gò a k’dá nawh, tui a ng’hngók lo vai cuh güng neh om ci gùi.
Sin zah-ah, kum thumkip-lei-’chéit púm gàw ci-ah k’chàng tumat om ci. Ani cuh, ng’zän hleih Jesu nawh hnguh neh so lo pi ci-ah hmat neh, “Na gái hlü ci ang?” ci neh ng’si ci. Gàw ci nawh phih, “Báwi aw, tui k’büm ung na m’hluh tu khai kä om hleih ka ng’bü tu zah ung a hei cuh, ka mà-ah kium ci,” ci neh Báwi àm piéin ci. Jesu nawh, “Ng’Düí lo-ä. Na ihnák ’kot neh hteit-ä,” cinak ci. Cun-ah k’chàng cuh, a k’tén-ah gái bà neh a ihnák, ’kot neh hteit ci. Cu k’hngüp cuh kíün-hngüp ah kia ci.
Cun-ah kia hleih Judeu gùi nawh, “Kíün k’hngüp ah kia ci. Na ihnák kä na ’kot khai,” ci neh gái bà ci àm piéin ci gùi. Ani nawh, “Na m’gái bà ci nawh kei àm, na ihnák ’kot neh hteit-ä ci ci,” ci neh m’sàng bà gùi ci. Ngamí nawh phih, “Nang àm, na ihnák, ’kot neh hteit-ä ci ci cuh a u ang?” ci neh ng’si ci gùi. Gái bà ci nawh, ani a u-ah a kiák kä ka hmat ci. A cun-ung om ci-ah k’chàng ng’bum ung-kah, Jesu cuh, hläih èi bà ci-ah kia ci. Cun kon-ah, ani cuh khàw im-ah Jesu nawh hnguh neh, “Tuh-bäih na gái bà pi ci. Nang ung a’ka lo pi-ah kia lo hmán vai hleih kä na kat èin bà vai,” ci neh ani cuh, m’cäi ci. Ani m’gái bà ci cuh, Jesu-ah kia ci cuh, hteit neh Judeu gùi àm m’thein gùi ci. Cun cuh kíün k’hngüp ung a ci-ah phäh-ah, Judeu gùi nawh, Jesu cuh, ’ka lu nak ci gùi. Cun tu pang-ah phih, Jesu nawh, “Ka Pá nawh a tuh-güt bi ci.
