Bä ciah Euphrasia ah ghünlu a mong
Centcury 5 yah ung Constantinoble mânggo cu Ekaret pakkhui k’chang k’kyawng khui ung ka no ng’tüi lo ciah a k’hmo tumat ah kya ciah Euphrasia phäh ah a kya ah yaica nak gui a buiawt yah ah hnün ah kya ci. A ni cu Khanpughi yumäp ne bä ciah Nu Pa ung ka no ng’tüi om lo ciah kya ci. A pa cu a ni hluktui a ok yah ung shih ciah kya ci. Ekaret Theodosius cu a cun ah k’hmo hta la ne a nu cun phih a m’htei ah ciah kya ci. Euphrasia cu a khokum k’hma be lo hleih Theodosius no a kya ah ng’büh ng’mang ciah Hlotdaw a mat tumat ah hta awn a letthat hlak goi vai ah a bü ah kya ci. k’kyong khui a ni khoi vai lah a ni letthat vai cu Euphrasia a ng’vai lo kon ah a bi peit goi vai ah a mi m’hläih ah kya ci. A khokum 7 gok lo hleih a ni ah nu no ngami ah nu pa a om nak ah kya ciah Eygpt kho ah a hta Euphrasia cu a khah püi ah kya ci. Eygpt kho ah gok ne a ni cu yum nak lam ung a mi ghünlu gänap ne k’taigü ne om ci gui ah Mamah Yahteih ng’htoi gui cu yum ne a cun ung hteit ne k’taigü ne om tu khai ah a nu am shang hleih a nu cu a kya ah yei tu k’tat ne a mi k’tui ngo lut lo ciah kya ci.
A nu no a kut k’shei ne Boi Yesu ah gùp ah mâ ah a k’taigü cu “ Boi Yesu Christu aw, shin ah k’hmo cu nang Boi ah ghung m’htei nak ung ka no na do ä”. ci ne gänap ghüt ne ta a hta cu Mamah gui ah nong ghüt ne kyap ne a im ah hteit ba ciah kya ci. Euphrasia cu a khokum k’hma a lo yah ung a letthat vai ah a mi pein gui cu dam ba ciah kya ci. A ni am a mi peit ah ngui ghui khohtang phih Ekaret shangpughang am m’khäh ba ne k’chang gui a mi gunhtot nak ung a mi mang vai ah m’cäi ciah kya ci. A Nu cu a hta k’hngumi hta a cun ah hta ghüt ne a hteh ba kon ah kho kum a pi ghüng na ghüt ne ta a nu cu shih ciah kya ci. A nu a shih ng’yak ciah Theodosius cu a pyein ne hlo ah bi k’khai ah ng’ngai ne Euphrasia cu letthat hlak khai ah pyein hleih Euphrasia no ma ne a ni am ca m’khäh ne ta a mät htitheing ciah ghünlu awn Khanpughi ah ma ah ng’pyhun ba ne ta a ni ung om ciah im ni k’kcham ni a van yoi ne dupyam ci gui am k’pai ne a pei gui vai lah k’phan k’chang gui a van a m’hlot ba vai ah ca a m’khäh ah kya ci.
Theodosius cu Christu kum 395 ung shi ciah kya ci. A ni no kä shih pha ung Euphasia no a ng’yak hlü ah hlo ah a van k’be pe ghüt ciah kya ci. A ni cu toktap nak gui a om lo ah a kya ung Mamah gui ah k’phang nak ng’shang ne a mi pyein ah hlo ah m’lung m’yo m’nem nak lah ng’yu ba nak gui awn a k’ni ah läk ne bi hleih a k’she k’ka gui phih m’chüt näng hnging ciah kya ci. A ni cu a k’sheit kâ ah toktap nak gui awn yai ci gui k’pyhon nak gah ba khai gui ah ci pe gui hnging ci. Kho k’hngüp ät ung a kutkho cat ne a k’nga pang, a m’gong ang ciah a k’hmohta tumat cu k’taigü ne a k’hmo ah k’khan ah Boi Yesu ah shing kang taih ne “ Nang ning tüipyang ciah Khanpughi ci ne k’taigü pe hleih a k’hmo cu gai ba ciah kya ci. A ni cu a khokum 30 a be ah chüt hleih Mamah kyawng ung om ne bi bi ciah kya ci. Euphrasia cu k’chang hei gui awn kä täng ein ne a kya ah hngiphngäi hta ne a m’lung m’yo m’nem ne om ciah k’chang tumat ah kya ci.
