M’Cäinák a k’däm pí cuh  a i ang?

Ngamí-ah ng’htà püi ng’si k’cà cuh, ng’za u neh ngami cuh, Báwi nawh a k’ní-ah a m’sàng bà gùi cuh, hnguh neh k’chü m’cäi süm tumat nawh k’èt neh a m’cäi gùi phung ung a i a m’cäi cuh, a k’htük ang?” ci neh ng’si ci. Jesu nawh phih, ani àm a piéin bà cuh, a m’cäi k’htük cuh, “Israel aw, ’ngài-ä. Na Khãnpùghí cuh, Khãnpùghí tumat bäng-ah kia ci. Na Khãnpùghí cuh, na m’lung púm-ah, na m’chàpúm-ah, na k’tha gùi púm-ah m’hni-ä. Sin a m’cäi k’htük-ah kia ci. A k’hngihnák cuh, a cun awn täng ci. Na ng’khaw k’chàng cuh, na mät-a hlo-ah na m’hni vai. Sin-ah m’cäinák goi-a tah däm tu bà ci, a i kä om ci.”  K’Chü m’cäi süm nawh phih, Jesu àm a piéin bà cuh, “Bä ci, nang saza, a k’càng bäbä na piéin ci. Khãnpùghí tumat bäng om neh, Cun kon-ah a hei Khãnpùghí kä om ci.  Ani cuh, m’lung púm-ah, hnguh hmat púm-ah, m’lung k’thá om ci phung awn m’hni, ng’khaw k’chàng cuh, mät-a hlo-ah m’hni cuh, mei awn m’chih-ah hlik hngáwng ung lèng neh, m’ghu ng’thãnák phung avan-a tah bä tu bà ci.”  Ani nawh hmat neh a piéin cuh, Jesu nawh hnguh neh,“Nang cuh, Khãn-mòpí ghin-khàw awn, kä na hla hngá ci,” ci neh ani àm piéin ci. Cun kon-ah, a u nawh phih ani cuh, kä ng’si bà dat ci.