Wales kho ung ka Bä ciah  David ah ghünlu a mong

Bä ciah  David cu Wales kho ung ka no mâpi k’bäih ne bä ciah k’chang tumat ah kya lo ci. A ni cu century 6 ung ghüng om man ciah k’chang tumat ah kya hleih a ni a mong cu a u no a k’dâ kä hmat ciah kya ci. A ni cu Yahteih tumat ah kya hleih a ni m’hngi yei na tu ci gui ah k’chang gui no Aquatius ci ne a ng’ming a mi chü ah kya ci. A í ah kya hleih ci ung a ni no Wine lah Beer ah ta tui k’hti yum tub a hleih a cun ah a ming a mi chü ah kya ci. A ni cu k’chang gui ah k’khan ah k’chü m’gein nak ah bi lah a kya ah m’hteng ne ng’shing ciah läklam gui awn kyünhloi ne om cu a k’tung pi ah bi lo ne om ciah kya ci. David cu bi a mi bi ah k’phei ah k’taigü ne lam ciah om k’ih gui awn k’tha na ne om ci gui a phäi na gui ah om nak Mynyw ung om ciah Yahteih kyawng cu m’düih ciah kya ci. Kä hlü hleih ng’hta ng’ko ne kya gui cun phih kä k’bäi ciah kya ci. Ngami cu lai a mi ton yah ung hleipat m’na a mi mang ah ta a mi k’tha mang ne bi ci gui ah kya ci.

Wales pak’khui k’chang gui cu kho m’dek ung tak ci ungka no ng’lih lo ciah Daffodils k’hluhlen ngah gui cu Bä ciah David ah poi hngüp ung hlui hla ne om ci gui ah kya ci. A cun ah hluhlen ngah gui a mi hluihlak cu a í ah kya hleih a mi hlui ci cu a u no phih kä hmat ciah kya hleih hmat tu hlü ci gui am m’thein tu ne kä gah ah kya ci ci ne Sheksphere no a guk cu om ciah kya ci.