Khãnpùghí-ah m’geinnák, a m’tängnák màwng k’thùm.
Cun zah-ung, ngùi k’phlám k’lók gùi ni, k’chàng k’sé gùi ni cuh Báwi Jesu ng’ngài tu vai neh a pèi-ah lo tu u hleih Pharisee gùi lah k’chü m’cäi k’süm gùi nawh lo u neh, “Sin-ah k’chàng nawh kat-mah gùi, zèi na gùi neh ngami gùi-awn vun neh èi aw tu ci,” ci neh m’suk cha neh piéin ci gùi. Cun-ah kia chü-tah Jesu nawh phih, ngami gùi-àm, m’tu m’täng neh piéin ci.
Cun kon-ah a piéin cuh, k’chàng tumat-ung a htá k’hngih om ci. Nganí-ung-kah a k’hmó tu bà nawh, “Pá-aw, kei kavai-ah khawh-tang cuh na pe-ä,”ci hleih khawh cuh, k’pai goi ci. k’Hngüp kä sõ pha hleih htá k’hmó cuh, a phe-ah hteit neh a gok nák-ah a k’sé-ah om neh a säm phùng m’dí zop ci.
A k’om phùng a ploh-htah zop-àm, a om tunák-ung, a kia-ah khàw-zõ lo hleih a mät-ah ei mang vai ng’cét chü-tah Hteit neh pigò k’chàng tumat-ah om tu hleih cun-ah k’chàng nawh vok vuh hlak ci. Vok-ah ei ng’lung-mà-awn a poi k’bé tu hlü hleih a u nawh phih kä ei hlak ci. Cun kon-ah süm lo bà neh ka Pá-ah im-ah ng’hloh ci gùi hngo va-nge lo awng neh èi u vü. Kei läí si zah èi-ah cói neh ka si ci. Kei ng’düi lo neh Pá-ah im-ah hteit bà neh ka piéin vai cuh, “Pá-aw, kei nawh Khãnmòpí lah nang Pá, ka ning kat na goi ci. Tuh-bäih, kei cuh, htá-ah chü chin-ah kä ka kia ci, ka ci khai” ci nehtah Ng’Düí lo neh a Pá-ah hteit bà ci. A k’hláng-ah a om zah gé-ung, a Pá nawh ani cuh, hnguh neh m’gein neh ani-ah a na va dáwng neh a k’hngü-gòn-ung ’kiop neh ng’ùi ci.
A htá nawh phih, “Khãnmòpí lah nang Pá cuh, ka ning kat na goi ci. A tuh-bäih-ung tün neh htá ci neh chü vai-ah kä ka chin ci,” ci neh ani-àm piéin ci. A pá nawh a phàn-àm piéin neh, “k’Htù ng’säi k’ni pí, k’seng neh lo püi neh m’hlui-ä. Akut-ung kut cüp k’hmák neh a khõ-ung phih khawdawk ng’leh hlak-ä. Pat m’lóng htá ngáwn neh mi èi-aw neh mi zèi kõ. A i-ah kia hleih ci-ung sin-ah ka htá cuh, si ci te, ghing bà ci. Maih ci te hnguh bà.” Lèng neh èi áwk ci gùi.
Lái-ah om te ci-ah, a htá k’tak’hngà cuh im pèi-ah gok lo bà neh ng’làm neh tum-’khawn-ah k’áw ng’zák neh Phàn-ah k’chàng gùi-ung-kah, tumat chü neh a i-ah a kia-ah màwng cuh, ng’si ci. Ani nawh phih, “Na nàü gok lo bà pi ci. Phiòng hleih hnguh bà neh na Pá nawh pat k’plán htá ngáwn pi ci,” ci hleih Ani cuh, king neh kä lut vai neh om ci. Cun-ah kia hleih a pá lut lo neh ani cuh chü ci. Ani läí nawh a Pá m’sàng bà neh, “Khaw-kum a k’dá ka ning bi pe pi ci. Na ng’zák hlü phih hmä-ät htá phih kä ka ning k’taih man ci. Cun tu pang-a phih, ka teih-püi gùi-awn zèinák vai-ah, mehtá tumat htá phih kä na na pe man ci. K’Hngumi k’sé gùi-awn, na khawh ploh-htah ci-ah sin-ah na htá lo bà hleih pat k’plán htá na ngáwn ci,” a ci.
Ani nawh a htá-àm piéin bà neh, “Ka htá-aw, nang cuh, kei-awn ni om lä ci. A k’om phùng cuh nang kah-ah kia ci. Na-nàü cuh, si-te ci, ghing bà ci. Chük te ci hnguh bà-ah kia hleih èi-aw neh zèi chin-ah kia ci.”
