Adventu kyün hngüp A hngih nak (Numaria ah kat nak kä om ein ciah ah hta Boi Jesu a kyä nak ah poi

Kcha khmà a ngphlä̀n kòn ah Galilee khò, Nazaret pìgò ah David ah ngshòòn, Joseph on ngdòn lo khai ah nglàmí tumat ah Kkhaanpùghǘ no a ngshä̀ Gabriel tǜi ci. Cun ah nglàmí ah ngmìng cu Maria ah kya ci. Kkhaanhtapup no gok ne “Na yèi tu vai Maria o, a nghtéi khmà ah na bä̀ ci néi. Kkhaanpùghǘ mät ning ompüi ci” ci ne a pyéin. Maria no cun ah kchü cu ngya neta cä́i ne shin ah nghnguhnghmatpüinák cu a i ah mòònglam mä’ ci ne ngngài ne om ci. Kkhaanhtapup no “Maria o, kä na kyüh èin vai néi. A i ah kya hleih cii ung Kkhaanpùghǘ no ning mhni tu hngá ci. Nang cu kyämah neta kpámíhtá ah na htá lo khai. Cun ah na htá cu Yèisu ci ah hlui vai. Ani cu ngvái kchààng ah kya lo khai. Hlǘngtài pí ci ah Kkhaanpùghǘ ah Htá ci ne chü lo khai gùi. A pá David ah ghunkhò cu Kkhaanpùghǘ no ani am pe khai. Cun ah kchààng no phih Yákùk ah htángshòòn gùi cu a kcùùm ah ngängmhtéi lo gùi khai. Ani ah ghunkhò cu a i yah ung phih a maihnák kä om khai,” ci ne pyéin ci. Maria no “Cun ah mòòng gùi cu i ah kya hnging khai ang. I ah kya hleih cii ung kei cu ka cèi kä om ci,” ci ne kkhaanhtapup am pyéin ci. Kkhaanhtapup no phih “Muh Khtí no ning kyum loona khai. Bä̀ pí ca Kkhaanpùghǘ ah mchütngnä̀ngnák no ning omna khai. A cun ah phäh ah cun ah om lo tu khai ah htángshòòn cu htíthéing ca Kkhaanpùghǘ ah Htá ci ne chü vai ah kya khai. Cun kòn ah a shìng ci ne chü màn ah na páihtá Elizabeth phih a kyämahnák kcha kchuk lo pyi ci. Kkhaanpùghǘ no kä a ci hnging i kä om ci,” ci ne pyéin chüta Maria no “Kei cu Kkhaanpùghǘ no a na phàn vai ah ka om ci. Bói no a pyéin ah hlo ah kei ung kya hlä,” a ci kòn ah kkhaanhtapup cu Maria aka hteit ba ci.