M’Thei m’cäi k’thài cuh a k’phiüm-a tah bä pí ci.

A i-ah kia hleih ci ung nami om kia cuh chü m’cäi k’süm gùi lah, Pharisee gùi-a tah kä bä tu bà ung Khãnmòpí-ah kä nami gok khai ci neh ka piéin ci. Cáü, pù pá gùi-àm, “k’Chàng kä ngáwn vai: k’chàng ngáwn ci cuh zùng im-ah, m’cha m’làng-ah kia khai,” ci neh ami m’cäì, nami ng’za tu màn ci.  Kei nawh nangmi-àm ka piéin cuh, a u pang-tah a phäí-nàü gùi a ú-gen düit ung phih, ani cuh, zùng im-ah m’cha-m’làng-ah kia khai. A phäí-nàü gùi àm, nang a k’gù k’pang ci neh a sài-nák-ung phih, hluki gùi-ah mà-ah, m’cha-m’làng vai-ah chîn ci. A phäí-nàü gùi àm, a k’gù cinák ci nawh phih, m’htèi-khàw mei gah chîn ci.  Cun-ah kia hleih, a-i-phih khawih-hngah vai neh ng’bum im-ah lo k’hläm nehtah na phäí-nàü gùi nawh kat tumat kù ami ning k’bün vai om hleih, a cu khaw im-’kiak-ah, na süm bà ung” na khawih-hngahnák vai cuh, nawng-èin ghütneh ng’hlat bà neh na phäí-nàu gùi na ng’gèi bà püi gùi cang vai. Cun kon-a vah, lo bà neh na khawih-hngah vai. Nang àm, kat ning k’bün ci-ah k’chàng awn, lam ung nani ng’gui ät zah ung m’lùng ng’ngaih nani ät bà vai-ah, k’sèng neh na ci vai. Kä cun-ung, Zung Báwi-am ning m’ap khai. Zung Báwi nawh thong Báwi-am, ning àp hleih, thong Báwi nawh thong-ung ning chúm lo khai. Thúng vai-ah ngùi,a pihtá phih kä k’poih eìn hleih, kä na thúng phã phùng ung kä na lut lo bà khai ci neh a k’càng-ah ka piéin ci.