M’tui m’hleih ne kä gah ah goipyam nak awn yaica ci gui ah a k’hmo hta gui ka vai Papa Shangpughang Leo XIV-14ah k’taigü nak
O Boi Yesu..Nang Boi cu a k’hmo hta gui na k’coi ung k’pom gui ne k’hngiphngäi hta hleih a k’ni vai na pe gui ciah kya ci. Tuhngoi hngüp kei mi gui no M’tui m’hleih ne kä gah ah goipyam nak awn yaica ci gui ah a k’hmo hta gui cu nang Boi ah lo püi ne ka mi ning gänap lo ci. Ngami gui ah yüüt hta ne k’tha nem ciah a mi kyä gui cu nang Boi na om ah a ng’dang nak ah a kya ah hlo ah ngami gui ah a mi m’neh m’oh ah ng’lak ah a mi gaih hta gui cun phih nang Boi ah ghünkho ah ng’dang nak ah kya ci. A mi bongpai nak lah kä ng’shing k’cha ci gui ah ng’ lak ah k’tha na ci gui ngami gui ah a mi k’kyawng khui gui am ng’ngaih u nak awn k’tha gui k’be gui ä. toktap nak gui ah ng’lak ah ka no m’hteng lo pi hti ciah yum nak awn a mi yum nak m’dang hlak gui ä. A k’hmo hta gui m’tuim’hleih m’htei m’hta ci gui ah Saya Von, Nurse gui lah m’htei m’hta ci gui ah a mi kut gui phih a ni vai pe tu gui ä. Ngami gui ah bi loh nak gui awn a k’cum ah m’hngin nak m’dang ne bi ci gui ah k’chang gui ah kya hlak gui ä. Khak ciah phupit k’chüchah nak gui a mi bi lo yah ung phih Nang Boi ah Htittheing ciah Muh a k’khang nak awn lam m’shüm tu gui ne a k’ni ah a mi bi loh m’ei m’ok gui neh a mi ci hnging vai ah m’lung ah ng’shäi nak lah hngiphngäi nak pe tu gui ä.
O Pa Khanpughi.. a mi m’neh m’oh ah phäh ah yaica geinvai ci gui ah a k’hmo hta gui päng ung nang Pa Khanpughi ah ah hmai ka mi hnguh hnging vai ah na m’thei m’thang ne na m’dang gui ä. Ngami gui ah k’tha nem nak cu kei mi gui ah k’chü m’gein nak ah m’lung a na m’düihthoh peit gui ne a k’cang ah ät nak awn ka mi m’htei m’hta gui hnging vai lah ka mi om püi gui hgning vai, m’hngi nak ka mi m’dang gui hnging vai na k’hngaphlang tu gui ä. Kei mi gui no nang Boi ah ng’yak hlü ah hlo ah k’taigü nak lah biloh nak awn k’tha nem ci gui ka mi gunghtot tu hnging ciah yumtu ng’bum ah na kya hlak gui yaica buiawt nak ah hngu ah k’chü m’gein nak ah a ng’yung ah kya u ne ng’ngaih u nak ah geit m’shí lah ghünlu ah ng’thu k’thai ah na kya hlak gui ä. Amen.
Source: Vatican News
