Bä ciah Miguel Cordero ah ghünlu a mong

Bä ciah Miguel Cordero cu Chrsitu kum 1854, November k’cha 7 k’hngüp ung Ecuador ghunkho, Cuenca mânggo ung ng’tüi ciah kya ci. A ni cu a ng’tüi lo ung ka ge no kä ng’chüih ng’kong ciah ng’tüi lo ne a kho kum k’hma a be ah chüt hleih a mät kä ng’düi tho hnging ciah kya ci. Ng’lami hta Maria ah no a m’dang nak ung ka no tün ne a k’ni ah hngün tho hteithton ba hnging ci ci-cu yum ciah kya ci. A ni cu kyawng Saya tumat ah kya ne hnguh shim nak gui ung ghuih ciah k’chang tumat ah kya ne Ecuador ghunkho ung maapi k’bäih ne bä ciah k’chang tumat ah kya lo ci. A khokum k’ko ah chüt hleih a nu no im ah ca a m’thei m’thang ah kya ci. A cun ung ka no Cuenca mânggo ung om ciah De La Salle Koyin kyawng ung kyawng a m’kai tu ah kya ci. A nu pa phäina k’tu no kä k’bäi tu pang lang hleih phih Christu kum 1868 ung De La Salle Koyin kyawng ung lut tu ne Miguel ng’ming awn Koyin ah kyat u ciah kya ci.

Cordero cu ng’thu ng’hta a he he gui m’thei tu gui ne a k’hmo hta gui no a mi ng’thei ng’thang vai ah mong gui cu pyantham pe gui ciah kya ci. A ni cu k’hmo k’tho gui am yum nak ah mong gui a m’thei m’thang tu gui yah ung a k’ni ah a mi hmat hnging vai ah m’thei m’thang hnging vai ah m’thei m’thang hnging ciah kya ci. A mät hta om ne k’tha na ne k’taigü nak ah läklam gui awn om ciah kya ci. K’chang gui ah k’khan ah hlayang ne, k’chang gui a mi yeikyai vai ah m’lep m’hle ne om thei ciah kya ci. A ghünlu pum a ni cu a k’cum ah kä gai ciah kya ci. A ni no a om nak ah pyinhtit lah Balgium ah om ciah kya hleih khotui kho k’aa awn kä ng’awi tu ne Barcelona ah Christu kum 1909 ung ng’plon ciah kya ci. A kyähla kä gai na daa lo ne a k’’hngu ah Christu kum 1936 ung a cop kä ni hleih shih ciah kya ci.