Papa Shanpughang ah ng’thu
“ Khanpughi no mik’mi gui a ngoiä phih kä na nong gui düt khai” Boi Yesu awn ng’hnguh ng’teng cu a k’hngüp täi ghünlu ung cang ciah yeikyai nak, tuihlim ci lah a k’khang cu a í hok cha a lo püi lah mik’mi gui mi m’lung a ng’kyak yah ung Khanpughi no mi mi gui ah ng’ming lah mi k’mi gui ah nga nak gui ung na m’htei gui ci. Cang ciah yeikyai nak cu ghünlu ah a hngüp ah kya ciah thüihlei nak gui a tuihlim nak lah a k’khang pe ciah kya ci. Ghünlu ung om k’ih nak a k’thai cu Boi Yesu lah a ni ah ng’thu lah bi loh nak gui ung K’hang hleih ng’dang ciah kya ci.
K’achang tumat a m’lung ah thüihlei yaica ne k’hngiphngäi ne lang ciah m’lung awn taga ciah Boi Yesu awn a ni ng’hnguh kon ah a ni cu a ghünlu no kä m’dam ba hleih yeikyai ne om khai ah kya ci. K’chü m’gein nak lah dìmkyäp nak cu ng’thong hlat ne k’chang gui awn ng’gei ng’cam ba vai ah k’tha gui gah ah ng’hnguh nak ah kya ci. Coigaa ci gui m’ei gui ne, a mi ih om nak vai kä om ciah k’chang gui mät ah im ah chüthäm tu gui ne, a hlui hlak vai kä om ci gui am hluihlak pe tu gui ne teng m’kyein gui ah kya ci.
Khanpughi no mikmi gui tumat hti ah ng’ming cu na k’shing gui khai ah kya ci. A tuihlim nak maih ne yeikyai nak nong cu a kya ah m’neh vai ah k’hmaleim ah kya ci. Cun tu pang ah phih a cun ah k’hmaleim cu k’chang tumat hti ah m’lung k’kyong ah om hnging ci. Boi Yesu no a k’chü ng’ngai ne om vai na m’cäi gui ci. Lam ciah m’shi cu a í hok cha phih mang ba ne kä gah ah kya hleih ghot düt ne kho awn leh vai ah kya ci. Mät no mät a í ah kä mong ba ah ng’ngaih cu a k’khang nak thuh thong ah kya ci. Khanpughi no mi mi gui a ngoiä phih kä na nong gui düt khai. A kya ah thuuk ciah k’hmaleim gui päng no Khanpughi ah ng’thu a do nak awn k’hma gü ba hleih taga ciah ng’thuni lam gui ung na hteih ba gui hlak khai ci ne Papa Shangpughang Leo no pyein ciah kya ci.
