Adventu a htük nak kyün k’hngüp
K’Hngi k’chã a dí maih lo vai lah, k’chàng-ah htá a lo bà vai-ah màwng.
K’Hngi, k’chã, ài-hli gùi-ung, k’hmütnák om lo khai. Khaw m’dek ’khãn-ah phih, pinle tui-nú ng’hngáwk-ah ng’hngum-awn, ’khúi päng cäí-cãt lo khai gùi. Khaw m’dek púm-ah, kia lo khai gùi hmat u neh kiü-kiok neh m’sin baihnák-awn, k’chàng gùi dí lo khai gùi. A i-ah kia hleih ci-ung, Mòpí khaw púm cuh a khawng zung púm-ah, ng’hngäk lo khai gùi. Cun zah-ung, k’chàng-ah Htá cuh a tài-mahnák- awn, ng’mei hngù-zah hmä lo hleih nami hnguh khai. Cun-ah màwng gùi a ng’tün lo zah-ung nangmi cuh, zäih-ah ng’düí neh nami lù m’tä vä. A i-ah kia hleih ci-ung, nami phiónnák vai ng’et lo pi ci.
Cun kon-ah, ngamí àm m’tu m’täng neh a piéin cuh, “Ng’Bãng ghing-ung lèng neh sing ghing päng teng vä. Alim lo bà-ung, khàw a chà lo vai nami hmat ci. A cun-a hlo-ah, cun-ah màwng gùi a kia lo-ung, Khãnpùghí-ah ghin-khàw ng’et lo pi ci cuh, hmat vä. Nangmí-àm a k’càng-ah ka piéin cuh, tuh-chü k’chàng ng’sòn gùi kä maih pha hleih cun gùi avan kia lo zop khai. Mòpí lah m’dek bo-vah dí maih khai. Ka k’chü läí, a ngói-a phih, a i-zah ung phih kä maih khai.
Nangmí cuh èi awk k’tat neh käü kavai bäng ng’ä-cäi neh nami kia zah-ung cun-ah k’hngüp cuh kä süm zah-ung, kä gok-èin lo khai-ah ng’ngaih navä. A i-ah kia hleih ci-ung, khaw m’dek ’khãnpúm-ah om ci-ah, k’chàng gùi-ah ’khãn-ah, thóng kéng, thá a ng’choi vai hlü-ah gok lo khai. Cun-ah kia hleih cun-ah gok lo khai phùng phión na neh k’chàng-ah htá-ah mà-ah om ci-ah k’chàng-ah ng’chüih neh nami ng’düih vai-ah, a ng’täi-ah ng’süm neh k’tài-gü vä.” Báwi cuh k’hngüp púm, khàw im-ah m’thei neh om ci. Mü läí-ah Htanlun khaw m’htung-ah kài neh om ci. Ani ami ng’ngaih tu vai-ah, k’chàng gùi cuh khàw im-ung, ng’dót htá neh a na ng’htòi ci gùi.
