Bä ciah Agatha ah ghinlu a mong
Bä ciah Agatha cu Christu kum 231 ung Italy ghunkhaw, Cicily mânggo ung k’chang bä k’kyawngkhui ung ka no ng’tüi om lo ciah kya ci. A hmo hta yah ge ung tün ne a ghünlu khanpughü am a gänap ah kya hleih k’chang gui ah yum m’hngi tu phung a van dam ciah kya ci. A ni yum m’hngi tu ci gui ung ka tumat ah kya ciah Roma a mat Quintianus no yumtu ne om püi khai ah pyein hleih Agatha no a maa a phäh ah m’lung she ne, Agatha cu Christian tumat ah kya ci ci-cu m’dang ne pyein ciah kya ci. Cun yah ung Christian k’chang gui cu yok’ka na ne ngon ciah ah shangpughang Decius cu Roma manggo ung a mâng yah ah kya ciah Christu kum 250 ung Agatha cu kä ni ci gui a mi bi nak ah im ngäng ciah k’pa mi tu mat ah khah püi ne a täng ah m’om goi u hleih phih Agatha cu Khanpughü no ghung m’htei hleih a m’lung kä ng’thonghlat ein ne a yum nak ung khäng htek ciah kya hleih a kähla k’pyhong khai ah om hnging ciah kya ci.
K’cha ät khe lo hleih Agatha ah kyä cu yün u ne yok’ka dukdei nak ah setah k’khan ah taih u ne, m’shì ng’koi awn a vun gui teek yop khai ah a mi gheh peit ah kya ci. A kyä pum m’ghuih ne yaica khai ah ci u ne-ta a k’hngu ah a hluk a mi ah pit peit ah kya ci. A cun ung ka no k’ghüp phli nak ung hman k’pi gui awn ng’con ci ah mei k’cak ah khan ah a plui ah a mi ng’le hlak ah kya ci. A cun ah yaica khai ah ci u neta thong kyong ah a mi ghon vai ah a mi khah ba püi yah ung Agatha noh a k’taigü cu “ kei na tüi pyang ciah Khanpughü aw, nang Boi cu shin ah khawm’dek ah m’hngi nak ung ka no na lo püi ne, k’chang gui ah yok’ka nak gui ka m’chüt näng hnging vai ah k’thagui na na peit ah kya ci. Kei ah ng’mü m’cha na do peit ä”. ci ne pyein ne ta shih ciah kya ci. A ni cu Christu kum 251, February k’cha a hngüp 5 hngüp ung Italy ghunkhaw, Catani Mânggo ung shih ciah kya ci. Bä ciah Agatha cu goipyam ci gui m’htei ne m’tui m’hleih ci gui ah (Nurse) gui ghung m’htei ciah bä ciah k’chang tumat ah kya ci.
Bä ciah Agatha ah ghünlu mi teng ah a kya ung a ni cu Khanpughi ah a gängap ah a ghünlu a htitheing vai ah a k’cum ah ghung m’htei ne, a ghünlu ung a buiawt gui ah yaica nak gui Khanpughi a yum nak awn cang ciah aungtang nak a gah ah hlo ah a yum nak ah phäh ah kyühkyok nak kä om ein hleih m’hteng ci ci-cu mi hmat ciah kya ci. A ni no m’müi m’cha lam ung a yaica buiawt nak gui cu Boi Yesu Christu ah Yaica Buiawt nak ung m’cut tu hnging ci cun phih na m’dang gui ciah kya ci. Bä ciah Agatha ah ghun m’htei nak awn Khanpughi no k’tha gui na pe gui hleih yaica buiawt nak gui m’chüt näng ne yum nak ung mi khäng htek lo pi hti vai ah mi k’tha na ko.
