Bä ciah John de Britto ah ghünlu a mong
Potugule ghunkho ung Taigü Boi tumat ah kya ciah John de Britto cu Christu kum 1647 ung ng’tüi ciah kya ci. A ni cu India ghunkho ung om ciah hlüngtai ci gui ah k’chang gui awn ng’hnguh ng’hmat hlüne Brahmin caste gui ah a mi thung yo ah a mi hlui hlak ah hlo ah om tu ciah kya ci. Cun tu pang ah phih a cun ah ng’hlui hla ne Khanpughi ah bi bi cu a u no phih kä a í ah hlui tä ne kä do ci gui ah kya ci. John lah a ni ah a hluläk gui cu a kya ah kalu nak u ne a mi kyä pum hmaleim ghong ah a mi ci gui ah kya ci. John de Britto cu Lisbon ung om ciah a im ung hteit ba ne ng’düm ne ta India ah hteit ba ne a ni ah bi vai gui bi ba hnging khai ah gai lo ba ciah kya ci. A kya ah k’u na u ne ghüh tu u ne ta m’kyüh m’kyok ne a mi ci nak ah hngu ah a ni ah Khanpughi ah mong lam gui a bi vai cu kho kum k’thum peng peng k’däih ne bi ba ciah kya ci. A k’hnguh ah Rajah Raghunatha no ghun kho ah pughi pa gui no a mi m’shuuk chuk ah ng’yo kho a m’cäi hlü ah phäh ah m’thei m’thang ci ci-ne puk ne-ta a mi pha ah kya ci. A ni cu a mi ngon nak vai k’hngüp ät bäng va k’poih lo ba hleih ca ng’lep ät a guk ah kya ci.
Cang ciah khanpughi m’shuuk chuk caih yum nak a mong kei ne ka m’thei m’thang ci. K’chang no a pyan ah kho gup gui kei no kä m’shuuk chuk ciah kya hleih kei a mi na hei nak ah kya ci. A cun ah phäh ah ka shih vai cu a k’cang ah bä khai ah kya ci. Nang mi no kei am ka Boi ung ka yai kyai vai ah na na mi na ci ah kya ci. Ka shih vai cu ka güng ciah kya ci. Ka shih nak vai ah hngün a gok hlah vai ah ka k’taigü nak ung a k’tung pi ah ka bü ceng ah kya ci. Tu k’bäih kei no ka buiawt ah yaica nak lah ka bi loh gui ah phäh ah a k’ni phi lah a phu däm tu pi ciah k’hngüp tumat ah kya ci. A ngong kho ngoi ah kya ciah Christu kum 1693 January k’cha 4 hngüp ung k’chang ng’bum no lo ne a mi teng lo tu ah kya ci.
