“The world day for Consecrated life” poi bi ci gui.
“The world day for Consecrated life” hngüp cuh February a k’hngih nak Bawi Jesu kho im ah ami gänap nak a k’hngüp ung Mindat K’taigü mang kho, Mindat, St. Theresa ng’bumim ung Maa mah gui St. Joseph ng’htawi, FMM gui lah St. Theresa Maamah gui gha cuh ng’bum lo neh k’taigü ci gui. Missa gän ap nak ung Mindat k’taigü Mang Augustine noh khong mang neh k’taigü ci gui.
Mindat k’taigü mang noh ” Maamah gui cuh Khanpughi noh yei nak gui neh a ning chü gui a kya ci. Khanpughi kavai a mi ghüng neh mi k’tha nak ko” ci neh k’thagui pe gui ci. Khanpughi ah ng’chü nak cu a ni awn a täng ah om ne a bi bi vai lah a ni awn a täng ah om vai ng’ya hlü ne a na chü gui ah kya ci. A cun ah a na chü gui gui tumat hti no Khanpughi ah ng’yak hlü ah hlo ah hlü ci gui am gunhtot m’htei m’hta ne mät ah ng’kot ng’et gui ah khan na phih a k’ni vai bi peit vai hlü ci. community life ci-ah a täng ah om, a täng ah ei ne, a täng ah k’taigü ne om nak ah a k’hngüptäi ghünlu ung tumat no tumat yei na ne tumat ung hlü ci a om ung k’poih ba ci no a cun m’kyüm be tu pe hleih thüi yei gui a van ung thüi yei ät ne om vai hlü ci. Cun kon ah ng’phep guih ne a mi ghünlu gänap pe tak ci gui ah Religious gui cu geit ko vai ah m’shi vai hlü ah kya ci. Yaica buiawt ci gui, thüi hlei gein vai ci gui ah k’tha gui ah a mi kya ah hlo ah Khanpughi ah mong lam kä hnguh hmat ci gui ah a mong a k’coi lam yung ung phih ngami gui ah m’shi geit cu ng’lih pyo hnging ciah kya ci. A cun ah kya hleih Religious gui cu a I ah hlok ah yaica nak gui a om ung phih a düm hta ah Khanpughi am gänap ne Khanpughi awn a täng ah a k’hngüp täi ghünlu k’däih hnging vai ah k’tha nak ung Khanpughi no hlü ciah k’tha gui ning k’be gui khai ci ne Taigü Mâng Augustine no k’tha pe ciah kya ci.
Msgr. John Om Se no Religious Mamah gui am k’tha a peit nak ung Papa Shangpughang Francis no The Joy of Consecrated lif ci ne a pyein om ciah kya hleih Khanpughi no a na chü gui a k’ni ah shüm ba ne Khanpughi ah nibä nak ah phäh ah mi gah ah kya ci. Khanpughi ah ni bä nak ah phäh ah va mät ah ghünlu gänap peit takt u hnging ah va kya ci ci cu shüm ba ne yei tu vai ah kya ci. Khanpughi ah ng’yak hlü ah hlo ah a k’cang ah gänap ah a kya ung a cum ah m’lung cu yeikyai hnging khai ah kya ci. Kho m’dek no kä na peit hnging ah dìmkyäp nak lah yeikyai nak cu Boi Yesu no na pe gui nging ciah kya hleih Khanpughi ah a na chü thäm nak ah a ng’phlan cu hmat ne yei kyai nak awn ghünlu gäap peit tak hnging vai ah kya ciah kya hleih yeikyai nak awn Consecrated person gui no na mi ghünlu gänap vä ci ne k’tha pe gui ciah kya ci.
