Si ng’chot m’neh mah k’hngumí tumat m’gái bà neh shi ci m’ghün ba ci.
Jesu cuh, ng’hlè-’kõ awn, vang-’kam-ah hteit bà hleih ani-ah k’chàng a k’dá ng’bum lo ci gùi. Jesu cuh, pinle pèi-ah om ci. A cu zah-ah, Jairus ng’ming-nak ci-ah, cãgat k’seng cuh, lo neh Jesu hnguh neh a khaw pèi-ah ng’bóp htá neh“Ka htá k’hngu ng’cet ci. Ani cuh, gái bà neh a ghin vai-ah lo neh a’khãn-ah nakut taih lo-ä,” ci neh ng’huinák ci. Jesu cuh, a hlu-ah hteit tu hleih k’chàng a k’dá phih ng’buh tu kiu neh ng’läk tu ci gùi. Cun zah ung kumgha-leigoi púm, si ng’chot hleih ng’kùng ci-ah k’hngumí tumat om ci. A khawh-tang ng’piüi lo àwng hleih zái-cã neh k’chàng-m’gái-k’chàng a k’dá-ah ng’kùh ng’man tu hleih phih, kä ng’mang bà neh ka lo pí te ci-ah kia ci. Jesu-ah màwng cuh, ng’za lo tu neh k’chàng gùi-ah ng’lung, a hngú-ah lo neh a hlui tòn ci. A i-ah kia hleih ci ung, “Ani-ah hlui htá düit, ka tòn ung phih, ka gái bà khai,” ci neh piéin ci. A cu vai-àm, asi ng’chot cuh, kik ci. A gái bà cuh, a mät nawh hmat ci. Jesu nawh a mät ung-kah, a ã a luh lo hmat nehtah k’chàng gùi täng-ah ng’hlat neh “Ka hlui a u nawh tòn ci ang?” ci ci. A hlu-läk gùi nawh phih, “k’chàng gùi nawh sin-ah ning k’búi u hleih tah” a u na tòn ci, na ci ci?, “ami cinák tu bà. Jesu nawh phih, tàwn ci cuh, a hnguh vai-ah ng’hlat lo neh teng ci. Cun-ah hngumí nawh a mät ung kia ci cuh, hmat neh kiü neh cãt neh a mà-ah m’khúk-dàwng neh a kia-ah màwng cuh, phlèh ci. Jesu nawh phih, “Ka htá k’hngu aw, na zùm nawh ning m’gái bà ci. Adim kiäp-ah hteit-ä. Na m’neh nák ung-kah phiòng-ä,” ci ci.
Jesu, cun-ah a k’chü zah k’sùng ung cãgat-a kah lo u neh, “Na htá k’hngu si pi ci. A i-ah kia hleih Jesu na zái-cã hlak líng ci ang?” cinák ci gùi. Ami piéin cuh, Jesu nawh ng’za neh, “Kä kiü èin-ä. Zùm düit-ä,” ci neh cãgat k’seng àm piéin ci. Petru, Jacob lah Jacob ah a nàü Johan kon-ah a u phih kä ng’läk tu hlak ci. Cãgat k’seng-ah im-ah gok u hleih pan-m’cãi neh kiap ci gùi ni a kia ah m’la ci gùi ni cuh, hnguh ci. A ’kiong-ah lut neh, “A i-ah kia hleih pan-m’cãi neh nami kiap ci ang? k’Hngumihtá si-ci ah kä kia ci. Ip hngim ci,” ci neh ngami àm piéin ci. Ngami nawh phih, Jesu cuh, m’lep neh gaih tu ci gùi. Ani nawh a’kiàwng-ah om ci gùi avan, a k’pung-ah tüi èin gùi neh a khah lo püi gùi lah, k’hngumihtá-ah a Pá lah a Nú mah-ah, k’hngumihtá a ng’zän nák-ah hteit ci gùi. K’Hngumihtá ah kut vèn neh, “Talitha koum,” ci ci. (k‘Hngumi-htá aw, let lo-ä, nang àm ka piéin ci,’ ci neh a piéin hlü-ah kia ci.) k’Hngumihtá cun phih, a cu vai àm let lo neh m’khãn neh hteit ci. Ani cuh, a khaw kum gha-leigoi lo ci. A cun hnguh tu ci gùi cuh, akia-ah cäi ci gùi. Cun-ah màwng cuh, a u àm phih kä piéin èin khai gùi-ah, m’cäi gùi neh k’hngumihtá àm phih, a ei vai péit hlak gùi ci.
