A K’ni pi-ah Peitak Nak
“Kei-ah k’khan-ah Bawi noh ana m’hngi nak cuh ngami-ung om neh kei cun phih ngami-ung ka om tu vai-ah Khanpughü-ah ng’ming cuh ngami-am ka hmat hlak gui püi ci nei,cein kon-ah phih ka hmat ba hlak gui khai nei.”
K’hmo hta gui-aw Khanpughü noh mikmi gui kavai ci neh ahla ana m’bei gui vai güt chüt hleih ana m’hngi gui cuh na mi hmat ci mäi.
Yeisu Bawi cuh ashih kon-ah phih mikmi gui-awn atäng-ah om hlü ci.Yeisu Bawi cuh ahlu läk gui ci-ah pyein-ah ateih püi gui (12)-awn vaai ghum neh ei awk nak tumat cuh bi ci. Cun cuh a k’hngu pi ei awk nak-ah kia neh ami ei awk vai gui cuh m’htut lah capyit tui-ah kia ci. Cun-ah ami ei awk nak-ung Bawi noh m’htut lah capyit tui cuh amät-ah hla lah shi-ah m’thong m’hlai ci. A hlu läk gui noh phi cun gui ami ei awk nak-awn Bawi cuh ami ghün om nak-ung do chang ci gui.
Yeisu Bawi noh k’chang gui tumat lah tuamt m’hngi tu ng’kyu neh om vai cuh ng’ya hlü ci. Cun-ah kia hleih Bawi Yeisuu noh m’htut lah capyit tui cuh a shi lah a hla-ah ami m’thong tu hnging vai-ah ahlu läk ng’shä gui-am aa na pe gui ci. Cun-ah aa na cuh k’taigü mang gui lah k’taigü Bawi gui noh ng’do neh gah tu ci gui.
Khanpughü lah k’chang gui ät neh om vai cuh Bawi Yeisu noh ng’ya hlü ci. K’taigü Bawi gui noh Bawi-ah ng’thu cuh ami m’cu ba-ung m’htut lah capyit tui cuh Bawi-ah shi lah hla-ah ng’thong ng’hlat lo ba ci. Cun-ah Bawi-ah shi lah hla mi ei awk nak tu-awn mikmi gui cuh Bawi-awn atäng-ah mi om tu neh mi ät ba neh mikmi gui-ah ghün om nak-ung na om na ba gui ci. Hti theing ca shi hla Secramentu cuh Khnapughü noh ana peit gui-ah ni pi k’bäih ca peit tak nak-ah kia ci.
