Papa Shangpughang ah ng’thu

“Mi mi gui cu Khanpughi no a m’hngi ah hta k’hngu hta k’pa gui ah kya ci”  Mi mi gui cu a í no phih Boi Yesu ah m’hngi nak awn kä na m’cha m’lang gui hnging khai ah kya ci. Boi Yesu ah phäh ah Pa Khanpughi awn mi ng’hnguh ng’hmat ciah kya ne mi yum nak awn Khanpughi am mi mät no mi mät mi gänap ciah kya ci. Boi Yesu no k’chü khan ne a pyein nak ung a mät no a mät m’dang ne mi mi gui am teihpüi ci ne na chü gui ciah kya ci. A cun no mi mi gui ah ng’ngahtüh a na m’shün pe gui bäng ah kä kya hleih ngoiä shüm lä vai gui ah a mong gui na m’thein kan tu gui ne vang ah vei ät vai ah ng’hta ng’ko nak ah hnguh shim nak tumat ah kya ci. Khanpughi lah k’chang ah pyhon nak ah a mong thuuk ciah cang lam cu a ng’lang ung na ci pe gui ci lah m’dang na a van ah ng’kyüm be nak mi mi ka vai ah Boi Yesu ung mi mi gui ka vai ah k’khang ne ng’shüi ciah kya ci. Boi Yesu no a mät lah Pa Khanpughi awn a ni ng’hnguh hmat nak ung mi cumboi nak tu awn Pa Khanpughi a na m’dang gui cu Pa Khanpughi no a ni Kho m’dek khan ah k’chang ah kya nak a ci nak tu ung ng’dang ciah kya ci.

Mu Khanpughi ah bi loh nak awn Hta Khanpughi lah Pa Khanpughi ah ng’hnguh ng’hmat nak ung mi cum boi tu u ne Khanpughi cu a k’ni ah mi hmat tu ciah kya ci. Khanpughi no mi mi gui am a mät no na ng’hnguh ng’hmat püi gui ciah kya ci. Boi Yesu cu Pa Khanpughi mi hmat nak ah hngün ah kya ci. Boi Yesu cu Mi mi k’chang gui ah hnguh ah om ne k’chang ah kya na ci tu ciah k’thu k’ni ah kya hleih a ni ah ng’kyüm be caih k’chang ah a kya nak cu Khanpughi no mi mi gui am na m’dang gui ciah kya ci. Boi Yesu ah a shi nak lah a ghün lo ba nak no mi mi gui na k’pyhon gui ne na m’ät gui ciah kya hleih Boi ah k’chang ah kya nak a ci nak, a ng’tüi nak, goi pyam ci gui a m’gai ba nak, toktap nak ung ka a k’pyhon nak, a m’thei m’tham nak, a yaica buiawt nak, a shih nak lah a ghün lo ba nak cu mi mi gui ah ng’lak ah om ciah Boi ah kya ci ci ne Papa Shangpughang Leo no pyein ciah kya ci.