Bä ciah John ah ghünlu a mòng

Bä ciah John cu Cyprusk’pyha ng’tang uk ciah Shangpughang ah hta ah kya ci. K’khonkhui un a nu pa a phäi na gui a van shi yop hleih John cu Christu kum 608 ung Eygpt kho, Alexandria ung ng’phlon ne om ciah kya ci. A cun ung a ni cu yumtu ng’bum khomang k’chang tumat ah kya lo ci. Eygpt kho yumtu ng’bum cu a van ng’pyhüt ng’pai tu yop lang pang hleih phih a ni ah htitheing ne lang hta ciah a m’lung k’nga lah gänap pe ta ne m’htei ne ät khai gui ah a ci nak awn k’chang päng no a kya a mi yum m’nai tu ah kya ci. John cu lang hta ciah ghünlu awn awn ghüng om ne pyam ne du ci gui am a ni ah saya ng’vai tu ba ci ne chü gui ciah kya ci. A ni cu a mät ah ih nak gui a gänap peit tak ah chüt hleih pyam ci gui ah k’khan ah ng’khai ciah kya ci.

A ni cu pyam ci gui no a mi bi vai gui cu a m’lung k’tha awn a k’ni ah bi pe gui ci. A ni no a gah vai chin ciah a k’tha phu shang gui ne Seiyungl ah Yahteih kyawng gui ah ka vai a ngui gui cu pe ta gui ciah kya ci. Pyam ci gui ka vai ah im coh pe gui ne kyämah ci gui a mi om nak vai ah seiyung gui coh pe gui ciah kya ci. Khotui kho k’she ah phäh ah yaica ci gui a ng’hloi vai lah thong khui k’om gui a m’hlot nak gui vai ah cäicat vai awng ah ngui gui cu mang ne bi pe gui ciah kya ci. Tui k’kyong ah a mi htinpow nu lut ne dí ciah hlumlei k’chang gui am cung lah pumgho gui a k’be a mi taih ah htinpow nu letsawng ah pe gui ne a mi hlumlei gui a ng’hloi ng’hlak ba vai ah gunhtot gui ciah kya ci. K’chang gui ah ni bä nak vai ah k’chang k’chü m’gein ne a bi loh gui a gung htot nak gui gah ne a mi ghünlu ng’mang lo ba ciah k’chang a m’sha cun no phih John ah ni bä nak gui kä shüm hmat ne kya ci gui ah kya ci. Cun tu pang ah John cu a k’cum ah peit tak gänap nak ung ng’khai ng’täih ciah kya ci. A ni cu a k’thum k’hngü ah kya ciah (Wednesday) lah a k’hngüp k’hma hngüp ah kya ciah (Friday) ung Phayakyawng k’düma ah ngo ne k’chang päng am pe tak ne a k’hngüp pum ngo ne ng’güng ciah kya ci. A ah bi lo ng’khai ng’lang gui ni ciah hngu tu ci gui cun phih a k’om awn ng’khai ng’lang lo tu ci gui ah kya ci.