Bä ciah Agnes ah ghünlu a mòng
Hto-me hta ciah ng’phlan ci ng’ming na ciah bä ciah Agnes cu a kya ah kyom htang ciah ah Roma ng’hngumi hta tumat ah kya ci. A ni cu AD 291 pheilang yah ung ng’büh ng’mang ciah Roma Pa k’khui k’chang gui ah kya ciah k’kyawng khui ung ka no ng’tüi lo ciah kya ci. Hto me hta ci cu (a bok, htitheing ci) ci ah phlan ciah kya ci. A ni cu a k’hmo hta yah ge ung a mät noh a mät Boi Yesu am a gän ap ah hlo ah a ni yum m’hngi tu ne latthat vai ah ng’shang ci gui a u pami gui ma gui no a ni cu a mät ah ghinlu a van k’chang gui ah mik awn kä hnguh hnging ah kya ciah mopi ng’pyangmi am a van ka gänap peit tak yop püi ci ne pyein ciah kya ci. A ni ah khäng htek ciah a ngah tüh k’puk pit cu kä ng’thong hlat hnging khai ah hmat lo ci gui ah pyangmi gui no Agnes cu Christian tu mat ah kya ci ci cu m’dang pe u ne, Christu kum 304, a khokum ghaleigoi ung maanggo hluki ah ma yah a mi khah püi ah kya ci.
Hluki no a ni hta ah m’hloi ne phih kyai, m’kyüh m’kyok ne phih kyai a k’ni ah ni püi ne ng’shi ca hlei phih Agnes ah a m’lung nga cu kä ng’thong hlat hnging a yum nak ung m’hteng ne a ni cu Christina tumat ah kya ci ci-cu ling ne pein ciah kya ci. Mei däi mei cang awn dukdei, yok’ka na u ne a hlü hlüah ci u hleih phih a ni ah a yum nak a khäng htek nak lah cang lam ah phäh ah a ling gai nak cu kä ng’pai hnging ciah kya ci. Cun-kon-ah Agnes am kä ni ci gui ah hngumi gui a mi om nak ah im ung khah püi ci u hleih a ni hton vai ne pong ciah k’pami hta tumat cu a mik m’dah ciah kya ci. A i phih ci ne kä gah lo u ne Agnes ah luk’ke cu m’chün pit ne Normentana lam ung om ciah Catacomb ng’phuh hngün ung ghon ne a mi phuh ah kya ci. A cun ah ng’phuh hngün cu Italy ghunkhaw, Roma maanggo ung om ciah kya ci. Christu kum 350 ung bä ciah Agnes a mi k’phuh nak ung phayakyawng a mi coh ba ah kya ci. A ni cu kä shih pha ung a pyein cu “ kei ah shi cu nang mi ah k’khim ung a koh tu lang pang ah phih Boi Yesu am ka gänap ah ka kyä läi kä htitheing ein khai ah ci kä na mi gah khai” ci ne pyein ghüt neta shih ciah kya ci.
