Corleone Mânggo ung ka Bä caih Bernard ah ghünlu a mòng
Bä caih Bernard cu Christu kum 1605 ung Corleone, Sicily mânggo ung ng’tüi ciah kya ci. Sicily mânggo ung om ciah capit k’cham tumat m’htei ne om ciah a ni ah nu pa no Bernard am Philip ci ne a ng’ming a ni hlui ah kya ci. A ni cu hnguh hmat nak ah ca gui kä ng’thei ng’thang tu hnging lang pang ne phih Shoe kho dok chui nak ah hnguh hmat nak a k’ni ah ng’thei thang ciah kya ci. A pa shi hleih a cun ah kho duk a chui nak awn a gah tu ah ngui awn a nu m’ei m’ok ne om ciah kya ci. 17 Century yah ung Spain ngui lah ne ng’hloh ci gui ah ga k’kap gui no Sicily k’pyha ng’tang cu a mi lak ah kya ci. K’chim a ng’shäi a k’ni ah bi thei ci gui ah kya hleih ngami no a k’hmo philip am a mi m’thei tu ah kya hleih a k’ni ah bi k’kot thei ciah kya ci. Philip no k’chim a ng’shäi awn ga k’kap gui no a mi kalu nak ah k’hngumi hta gui lah lai bi k’chang gui cu ghung gui ciah kya ci. K’hngih bäng k’chim awn a ni ng’tuk nak ung Philip no a ni awm ng’tuk ciah k’chang cu a k’däm ah leim ciah a tuk ah kya ci.
A cun ah ng’tuk ci goi ah k’chang tuk ne a phein kon ah phaya kyawng ung om ciah a khan hta tumat ung ng’thup ciah kya ci. A cun ah a om yah ung a k’hmo hta no a mät ah ghünlu ung cun düt a om cu a kholä ah kya ci ci-cu ng’ngahtüh lo ci. Christu kum 1631, December k’cha ung a Kho kum 27 be lo hleih Caltanisetta ci-ah Franciscan ng’htoi ung lut tu ne a ming cun phih Bernard ci ne a m’thong ah kya ci. A ng’ming bäng a m’thong ah kä kya hleih a ni ah om k’ih, m’lung k’nga gui phih a van ng’thong hlat ciah kya ci. K’chim a ng’shäi awn lo ne ghüh lo tu ci a om ung phih a düm hta ah om lo ciah kya ci. Changui ah k’khan ah kä k’chü k’nga ne ng’tuk ciah ghünlu ung ka no a mät no a mät kä k’chü m’gein ciah ghünlu ung gok ciah kya cah a m’lung k’nga ng’thong hlat yop ciah kya ci. A mät no a mät phep ne kyünhloi ne om cu a k’tung pi ah a ni ah bi loh vai ah ma mong ah kya lo ne Khanpughü yumäp ciah ghünlu ung a k’teng ah gok ciah kya ci. A ni cu Christu kum 1667, January k’cha 12 ung Palermo ah shih hleih Christu kum 2001, June k’cha 10 ung Papa Shangpughang John Paul II a mang yah ung Bä ciah k’chang ah kya lo ci.
