Cori Mânggo ung ka Bä ciah Thomas ah ghünlu a mòng
Bä ciah Thomas cu Christu kum 1655 June k’cha 4 hngüp ung Italy ung om ciah Cori mânggo ung ng’tüi ciah kya ci. Hto gui ghung m’htei ne Khanpughi yumäp ciah nu pa ung ka no ng’tüi om lo ciah kya hleih a k’hmo hta yah ge ung Khanpughi yumäp ne kya ciah a k’hmo hta ci-ne van no a mi k’shing ah kya ci. A khokum 14 ung a nupa shi lo hleih a ni cu hmei hta ah kya lo ci. Hto gui a ghung m’htei nak awn a be hta gui teng gui ne om man ciah kya ci. Hto gui a ghung m’htei yah cu a ni ah ng’müi m’cha lam a k’ni ah a ng’ngahtüh nak vai ah hngün ah kya ci. hleih a be gui a k’ni ah a mi k’kyawng khui a mi koi hnging vai ah a ci peit gui hnging kon ah Franciscan ng’htoi ung lut tu ne Christu kum 1683 ung Taigü Boi ah kya lo tu ciah kya ci. A ni au a kya ah k’taiü ne a k’cum ah Khanpughi yumäp ne a ghünlu läk lam gui awn a k’ni ah gänap tu lang pang hleih phih a ng’müi m’cha lam ung a k’cum ah ghong kheng geng ci vai hlü ah kho kum 40 peng peng yai ciah kya ci ci-cu a mät no pyein man ciah kya ci.
Thomas cu a kya ah pyam ne du ciah Boiphaya kyawng gui ng’phät ne ng’müi m’cha lam ung a k’tung pi ah k’tha gah nak ah kya lo khai ah mthong hlah pyang tham ba ne m’lung k’ni awn lang hta ciah m’thei m’thang ne duyai ci gui ah k’chang gui no a mi nong gui düt hta k’chang hta gui m’thei m’hta ne om ciah kya ci. A ni cu Italy ghunkho a k’däm ung hteit hton ghüi ne Khanpughi m’tam ne k’taigü ci gui awn a täng ah hteihton ne kya nak ung a m’lung yeikyai hleih om ciah kya ci. A ni ah m’thei m’thang cu a kya ah htihtaih ne van no a ng’ngaih hlü vai ah kya ci. A pyein vai om ci gui a k’ni ah cang ne ng’shunghei khai ah pyein ne k’chang gui no a mi läk hlü vai ah pyein ci. Bä ciah Thomas cu Franciscan ng’htoi ung om ciah Taigü Boi tumat ah läk lam vai gui a k’ni ah m’hteih ne läk ne ta mä a ni ah hlo ah ng’müi m’cha lam ung kä ng’kyüm be tu pha ci gui am phih a k’ni ah k’tha pe gui ne lam m’shüm gui hnging ciah kya ci. A ni cu a k’tung pi m’lung m’yo m’nem nak awn a ghünlu a k’ni ah gänap ciah kya ci. Christu kum 1729 ung Bä ciah Thomas cu shi ne Christu kum 1999 ung Bä ciah k’chang ah tumtung’bum kya lo ci.
