Bä ciah Thorfinn ah ghünlu ah mòng

Norway pa k’khui k’chang ah kya ciah bä ciah Thorfin cu Belgium ghunkhaw, Cistercian Yahteih kyawng ung shih ciah kya ci. A ni cu a ghün yah ung a ming thang tu man ciah k’chang ah kä kya ci. A mi k’phuh kon ah k’chang gui no a mi hmih püi man te ah kya ci. A shih nak khokum 50 a be kon ah im co ci gui ah k’chang gui no a ni a mi k’phuh nak ah ku cu co ne a mi hnguh ah kya ci. A cun ah ku cu thuk ciah kä kya ne ng’ui hta hleih ng’yak ci gui ah kya ci. A cun Yahteih kyawng uk ciah a ng’vai am m’thein u hleih a cun na gok a mi k’phuh ah k’chang a u ci cu Yahteih gui am ng’shi k’ca hlak gui hleih Wolter de Muda a ghüpa tumat no a cun ah gok cu Thofin ah kya ci ci ne pyein ciah kya ci. A cun ah aThofinn cu hngiphngäi ne a m’lung ni ciah kya hleih van no a yum m’nai tu ah k’chang ah kya ci ci-ne pyein ci.

Wolter de Muda cu Thofinn ah ukku ah k’khan ah m’hlüngtai ne m’nai nak ah ca guk man ciah k’chang ah kya ci. Shui ne hnguh ci gui ah k’chang gui cu khokum k’hmakip lo lo tu pang lang hleih phih kä dí maih ein ne om lä caih hlavun ung a mi ca guk cu hnguh ba ci gui ah kya ci. Yahteih kyawng uk cu a cun ah ca ng’guk ciah hlavun cu hteh püi ne ngoiä shüm lä ne van no a m’nai tu vai ah htin ciah kya ci. Cun kon ah Wolter de Muda a ghü pa am phih Thorfinn a mong a shüm ba phung a van a guk vai ah pyein hleih guk peit ciah kya ci. Thofinn cu a m’lung ng’shäi khai ah om ne, k’chang k’chü m’gein thei ne k’chang gui ah k’khan ah phih ng’khai ne om ci ciah bä ciah k’chang tumat ah kya ci.