Bä ciah Genevieve ah ghünlu a mòng
Bä ciah Genevieve cu AD 422 yah ung Paris Mânggo pei ah om ciah Nanterre ung ng’tüi ciah kya ci. Bä ciah Germanus no Pari mânggo pei ah hto am ei m’ei ciah a k’hmo hta ah kya ciah Genevieve cu hnguh ne a k’hmo cu maa lam ah Khanpughi ah mong lam bi lo khai ci-cu hnguh man ciah kya ci. Pari Mânggo ung ka no Mile 8 hlok hlak ciah piggo hta tumat ah kya ciah Nanterre ung a ni no a m’thei m’thang gui Genevieve no a k’ni hta ah a ng’ngaih tu cu k’shing ciah kya ci. Bä ciah Germanus cu a cun ah k’hngumi hta awn a düm hta ah ng’hnguh ne ng’hto ng’ko ci goi ah kya ci. Bä ciah Genevieve no Khanpughi am a ghünlu gänap hlü ciah pyein ne kya hleih Germanus no Genevieve cu htitheing ciah ghünlu awn k’chang a k’daa Khanpughi ah gok hnging khai ah ci hnging khai ci ne a nu pa gui am pyein ciah kya ci. A khong ngoi tumat ung Germanus cu Genevieve awn ng’hngu b ani ne Boi Yesu am a ghünlu a peit nak ah a m’dang vai ah shing m’kang k’tung a mi pyan ah seal tumat a peit ah kya ci.
Genevieve cu a kya ah ng’kyüm be ne k’taigü nak ung yeikyai ne kya nak ah k’kyawng khui ung ka no ng’vai lo ciah kya ci. A nu pa k’tu shi u hleih a ni cu Pari mânggo ung ng’plon ne a pighü awn a täng ah om ciah kya ci. Khanpughi yumäp ne a kya ah k’taigü nak ah ghünlu awn leng ne kho kum k’thum peng peng k’tha nak ciah kya ci. A im pei ah ka gui no a ni ah cäicat vai ah a buiawt gui cu a hle pyein ne a k’ni ah ng’shei ci ci-ne k’puk ci gui ah kya ci. Ngami ah ng’u ng’sheih nak cu Genevieve am tui ung a mi m’hteh vai ah chüt heih a mi k’u nak ah kya ci. A cun hmat ciah Germanus no ngami gui ah a mi ng’u ng’sheih gui kä om ein ba vai ah chüt hleih k’nga k’phlang gui hning ciah kya ci.
AD 451 ung Hun pakhui khong mang k’chang Attila cu Gaul ung lut ne a van m’dí m’dam yop hleih Pari ung om ciah k’chang gui a kya ah cäicat u ne a mi hngun a pyhon vai ah ci khai gui ah pong lo ci gui. Ngami am a pyein cu nang mi ah yum nak a om ah a kya ung Pari mânggo cu pyhong khai ci ne Genevieve no pyein ne Khanpughi ng’ngaih u ne k’taigü ne ami om vai ah k’nga k’phlang gui ciah kya ci. A k’cang ah Attila no ng’hlat ba ne Orlean va a tuk ah kya ci. Genevieve cu a kho kum 89 ung shi ciah kya ci. Tuhchü Pari ung om ciah k’chang gui no Genevieve cu a kya ah yum m’nai u ne a ni ah ng’ming awn peit tak gänap nak gui cu bi ci gui ah kya ci.
