Khanpughi ah Nu Maria

Htitheing ciah ng’lami hta Maria cu Khanpughi ah nu ci ne yum tu k’chang gui a van no a mi üm m’nai ah kya ci. 4 Century yah ung Constantible ung Taigü Mâng ah kya ciah Nestorius no Nu Maria cu k’chang ah kya nak ci tu ciah kBoi Yesu ah a nu ah vah kya ne Khanpughi ah nu ah kä kya ci ci-ne m’hteng ne pyein ciah kya ci. Cun tu pang ah phih Nu Maria ah cu Hta Khanpughi ah kya ciah Boi Yesu ah Nu ah kya hleih “Khanpughi ah Nu” ci ne chü vai ah kya ci ci-cu Christu kum 431 Ephet ung a mi bi ah Taigü Mâng gui ah ng’bum nak ung k’bäi ne a mi phukpit ah kya ci. A mi ng’bum nak ng’päng lo hleih k’chang gui a vna no Taigü Mâng gui am Mânggo pum ung hteit ghüi ne k’kot u ne yeikyai ne poi bi ci gui ah kya ci. A cun ah a mi ng’bum nak aung tang ci ci-ah a ng’hmat nak ah Papa Shangpughang a k’thum nak Sixtus no Roma Mânggo ung a kya ah hlüng tai ne däm ciah St. Mary Phaya kyawng nu a coh ah kya ci.

Tuhchü Boi Yesu Christu ah a k’khuipam vun a mi hlih nak lah Yesu ci-ah a ng’ming a mi kyon nak ah poi cu m’don ne bi ba hti ah kya ci. Yesu ci-ah ng’ming cu “k’pyhon ciah Boi” ci-ah ng’phlan ciah kya ci. A í ah kya hleih ci ung Boi Yesu a k’khuipam vun a mi ah nak ah k’hngüp ah kya ciah a k’hngüp k’chüih hngüp gok lo hleih Yesu ci ne a ng’ming a hlui ci gui ci ne  (Luka 2:21) ung a mi guk ah kya ci. A cun ah mong cu Gen-Kcho Catholic 17:12 ung “ Na hta ng’shoon Pakkhui ah htak’pa phung, mät ah im ung ng’tüi om ci phung mät ah kä ng’shoon te, a hei pakkhui ng’shoon ung ah ngui awn k’hleih ah k’pami phung, a ng’tüi om tuk on ah k’hngüp k’cheit a be hngüp ung shäm vun hlih nak na mi ci peit gui vai” ci ne Khanpughi no Abraham am a pyein man cu ng’ngai ne a mi läk ah kya ci. shäm vun hlih ci-cu Khanpughi am mät ah kyähla gänap peit tak ah kya  ci.