Johan nawh a mät-ah màwng piéin ci.

Cun zah ung Tui k’phùm Johan-àm, “Nang a u-ang?” ci neh ami ng’si vai-ah, Judeu k’chàng gùi nawh Jerusalem-a kah, k’tài-gü ng’vái lah Levi k’chàng a m’sah ami tüih. Johan nawh phih,  “Kei cuh Christù-ah kä ka kia ci néi,” ci neh kä m’zih m’thu-èin neh a ng’dáng-ah a piéin. “Cun-ah a kia-ung, Elijah-ah na kia ci ang?” ci neh ng’si bà u hleih ani nawh, “Elijah-a phih kä ka kia ci.” “Ce ng’sä-ah mä na kia ci ang?” ci neh ng’si u hleih “Ká néi,” ci neh m’sàng bà gùi ci.  Cun kon-ah ngamí nawh, “Nang a u ang? Keimí na tüi lo gùi ci-àm, kami m’thein bà vai-ah phäh-ah, na mät cuh a u-ah na kia na piéin vai” ci neh kia u hleih   Johan nawh, “Kei cuh, ce ng’sä Isaias nawh a piéin te-a hlo-ah, Khãnpùghí-ah lam, m’súng bà vä,” ci neh Hla-lái mà-ah m’lä m’khãng ci-ah, k’chü k’áw-ah ka kia ci,” ci neh a piéin.  Ami tüih lo gùi-ung-kah, a m’sah cuh Pharisee gùi-ah kia te ci gùi.  Ngamí nawh ng’si lo tu hngá neh, “Nang cuh kä Christù, kä Elijah, kä ce ng’sä-ah na kia-ung, a i vai-ah na m’si ci-ang?” ci neh ng’si u hleih  Johan nawh m’sàng bà gùi neh, “Kei nawh tui-awn ka m’si ci. A cun-ung phih, nami hngù-ah a u boh tumat om pi ci. Ani cuh, kä nami hmat ci. Ani nawh  Muh-Htí lah, Mei-awn ning m’si gùi khai.  Ani cuh kei kon-ah lo ci. Ani-ah khawdok gui, ka k’phián tu péit vai düit hngo, kä ka ’ká ci,” ci neh a m’sàng bà gùi.  Cun-ah màwng gùi cuh Johan nawh k’chàng gùi a m’sinák-ah, Jordan tui-làwng-ah vang gã-ah om ci ah, Bethany pigò-ung kia te ci.