K’kyung long Zone ung bi ah Jubilee of Youth

2025, December k’cha 14 hngüp Mindat Taigü Mâng kho ung om ciah K’kyunglong Taigü kho k’ngäng Taigü Boi Peter Om ghüng lah k’kyünhlih Taigü kho k’ngäng Mattew Ling Hung no khong mang hleih k’kyunglong Taigü kho ung a k’hmo k’tho gui ah Jubilee cu yumtu ng’bum gui awn ät ne bi ci gui ah kya ci.

*************************************************************************************************************************************************************************

 K’hmo k’tho gui ah Jubilee a mi bi nak ung K’kyunglong Taigü kho k’ngäng Taigü Boi Peter Om ghüng lah k’kyünhlih Taigü kho k’ngäng Mattew Ling Hung no yumtu ng’bum gui ät ne Missa gänap ni ne ta K’kyunglong Zone ung om ciah Tagü Kho a hei hei gui ung ka no lo tu ci gui ah k’hmo k’tho gui k’hngumi, K’pami hta gui khong mang ni ne a mi ghü ng’lah hlak gui ne a mi m’lung yeikyai khai ah a ni ci gui ah kya ci. Missa gänap nak ung k’kyünhlih Taigü kho k’ngäng Mattew Ling Hung no khong mang ne Kho m’dek pum ung Catholic yumtu ng’chang gui no a mi bi ah Jubilee a mong a m’thei m’kan nak ung, K’hmo k’tho gui ci cu maa lam ah yumtu ng’bum lah ghun kho ah ni bä hlüng tai nak vai ah bi lo hnging khai gui ah kya ci ne Papa Shanpughang Leo no a pyein ah mong cu m’thein m’kan gui ciah kya ci.

A cun ah kya hleih k’hmo k’tho gui no ngami ah a mi ng’chüi nak lah a mi bi loh nak hnging, a mi hnguh hmat nak gui awn a k’ni ah k’chang gui ka vai ah a mi mang hnging vai kya ci.K’hmo k’tho gui  cu tuhchü ghunkho gui ung ng’tukah nak gui om ne yaica nak gui buawt tu lang pang hleih phih Khanpughü a mi ng’ngaih u nak, a mi bi hnging nak gui awn m’dang  a mi k’tha nak vai hlü ci. A mi ng’ngaih u nak maih ci vai hlü ah kya tu lang pang hleih phih Khanpughü ng’ngaih u ne a mi ghünlu ung a mi ng’ngaih äp nak om ba ci ci-ah yumtu ng’bum ah m’thei m’cäi gui m’dang hnging ci gui ah a mi kya vai hlü ci. Htitheing ciah ghünlu awn ghüng ne om nak awn mät ah k’kyawng khui, mät ah piggo, mät ah yumtu ng’bum, mät ah ghunkho ka vai thei bang nak peit tak hnging ciah k’hmo k’tho gui ah kya vai, A cun ah dìkyäp nak, htitheing nak lah ng’ngaih u nak gui ng’yak hlü ci gui mät no k’chang gui ka vai ah maa ne a bi hnging vai ci ne mät no ng’yak hlü ah ta k’chang gui am peit tak hnging vai a mong cu m’thein khan gui ne k’nga k’phlang gui ciah kya ci.

K’kyunglong Taigü kho k’ngäng Taigü Boi Peter Om ghüng no k’hmo k’tho gui a m’thei m’cäi nak gui ung Jubilee ci cu a kya ah yei tu vai ah k’hngüp ah kya ci. Ng’thu k’pyhüm ung Jubilee ci-ah Khanpughü ah ni bä nak ah phäh ah shüm hmat nak ba ung kat nak gui ah phäh ah Khanpughü awn ät ba ci-ah ng’phlan ciah k’phan k’chang gui, thong khui k’om gui a mi m’hlot ba gui. A mi vuh m’hta ah  hleipat, m’na, vok, me gui a mi m’hlot ba gui ah kya ci. Khanpughi awn a k’ni ah ng’gei ba ne a k’ni ah mi ng’hnguh ba kon ah kho m’dek ah k’khan ah mi mi ah pyhon nak cu mi gah khai. Boi Yesu no ( Mat:6:33 ) ung Khanpughi ah ghünkho ma ne na mi shui vai ci ne a pyein cu mi shüm ba ne Khanpughi awn maa pi ne ng’kot ng’gei ba hnging vai hlü ci. Ghünlu ung a í phih ng’ngaih u nak ba vai kä om ein ciah yaica nak gui buitawt tu lang pang ung phih Khanpughi lam ah Withness of Hope ci cu mi mi mi m’dang hnging vai hlü ci. A caa mi mi ah mi yum nak gui khäng htek khai ah ci ne Khanpughi yum äp lo pi hti ah a kya ung Khanpughi no mi mi gui ah yum äp nak gui na k’b pe gui khai ci ne yumtu k’chang gui am m’thei m’cäi gui ciah kya ci.