Papa Shangpughang ah ng’thu
Papa Shangpughang no hlü ci gui gunghtot gui ne mät ah phei ng’leng ung om ci gui ghung m’htei gui vai ah mät ta ng’o cu k’chang gui am peit vai ah yumtu k’chang gui am Khanpughi no chü gui ciah kya ci. Boi Yesu no a na shan gui ah hlo ah ngoä shüm lä vai gui ah ng’kho cu m’thong hlat ne ci vai ah a na chü gui ah kya ci. A cun ah mòng cu Boi Yesu Christu a ghün lo ba ah mòng lah tuhchü mi buiawt gui ah k’khan ah a í hok kya kya ci ci cu ng’ngahtüh ne mi bi ah a kya ung Boi Yesu ah k’pyhin nak a bi loh gui ah mòng cu mi mi gui ah ng’hta ng’ko ng’hnguh ng’hmat nak, a k’tung pi ah Khanpughi, k’chang gui lah Khanpughi ah tüi pyan gui awn ng’thu ng’hta ng’hnguh ng’hmat cu ng’thong hlat lo khai ci cu na m’thei m’cäi gui ciah kya ci.
Boi Yesu a ghün lo nak ba ah khong ngoi ung Mary Magdalena no Boi Yesu ng’hlat ne a teng ba ah hlo ah mi mi gui no phih Christian ng’ngaih u nak ah ng’lung mà gui vuipai ne a m’theih vai ah mi ci hnging vai, mi m’lung ng’thung hlat khai ah mi ci vai lah mi buiawt gui ah yaica nak gui ng’bui khai ah mi ci tu ba hnging vai hlü ci. Mi mi gui ah ng’lak ah Boi Yesu om ci cu mi shüm ba vai ah kä loi ci. Bä caih John no a guk ah ng’thu k’ni ung John no a í hlok ah mi mi gui ah m’lung a na k’däk gui hnging ci ung Mary Magdalena cu a u kä om nak ah m’ümhngün ung hteit ne a kyah yah ung shih nak ung ka ghüng lo ba ciah Boi Yesu a k’ten ah kä k’shing ba ne ng’vong k’ngäng düt ah ng’ngai te ciah kya ci. A cun ah kä hmat ba cu Magdalena ah a hma ah kä kya ne a mät no a mät ah ng’ming a mät no ng’ya ba ne a bi loh vai ah mòng a hmat vai ah phäh ah kya ci ci ne pyein ci.
Boi Yesu no mi ng’thonghlah vai ah ng’yak hlü ci. Shi pi ciah Papa Shangpughang Francis no Christu kum 2015 ung a guk te ah Laudatosi a mong a k’ni ah van ng’ngahtüh ba vai na m’dang pe gui ci. A ni cu ng’vong k’cham m’htei ciah k’chang ah kä kya ung m’dí ciah kya khai. A cun ah kya hleih Christian gui ah ng’ngaih u nak cu shing m’kang k’tung ung shih ciah Boi Yesu cu gei ko ah ng’lung mà ah kya ne shih nak ung ka no a ghün lo ba cu a k’daa ah m’theih ciah kya lo ci. Paradisu ciah yei kyai nak cu maih ci ah kä kya ne hnguh ba ah kya ci. A cun ah kya hleih Boi Yesu ah a shih lah a ghün lo ba a mòng cu a ng’shün k’däih ah kya ciah ng’müi m’cha lam a ni bä nak vai ah a k’tung pi ah kya lo ci. Htitheing ca Muh no a mi k’o kä m’hlot hnging ci gui am k’o pe gui hleih kä mi hnguh gui mi hnguh ne mi bi vai gui a k’ni ah k’be ne mi bi ung vah a cun ah ng’vong k’kyam ah kya ciah Paradisu Yeikyai nak ung mi gok khai ci ne Papa Shangpughang Leo no pyein ci.
Source: Vatican News
