Bä ca Martin ah ghinlu ah mong

Ga k’kap gui gunghtot gui ca bä ca Martin cu Christu kum phya thum lah ghaleik’chuk ung Hungary ghunkhaw, Pannonia maanggo ung ka  yum hei k’chang k’kyawng khui ung ka no k’tüi lo ciah kya ki. A pa cu Roma ga k’kap tu mat ah kya hleih Martin cun phih ga k’kap tu mat ah a kya vai ah ga k’kap ng’htoi ung ling ne a mi luh tu hlak ah kya ki. Martin cu a kho kum m’kuleik’thum ung  Amiens maanggo ah gaa k’kap sakhan ung m’kot lo a ngäng yah ung dudoong ne ng’yoi ne ei ciah k’chang tu mat a kyaa ah m’yu hleih hngu ne ta k’sheng ne a mät ah hlui aat hteek ne a m’cot cu a cun ah k’yoi ne ei ca duyai k’chang am pe ciah kya ki. A cun ah mü a ih yah ung Martin a ng’mang she lo ne Boi Yesu no a cu ah hlui a m’cot  hlui hleih hnguh ne a cun ung ka no a m’lung nga ng’thong ng’hlat lo hleih Khanpughü am a ghinlu gänap khai ah ng’ngai lo ki. Cung phih a cun yah ung Barbarian k’chang k’yeng gui ah kha ca htapung gui noh a mi om nak lut ne tuk lo khai gui ah kya hleih Shanpughang Julian no ga k’kap ung ka no a ng’düm hlü cu ga k’kap ah a kya vai a kyüh ah ng’ngai hleih Martin no a pyein cu “ Kei cu Boi Yesu ah ng’ming awn hlehnget kä shäm ein ne ng’tung ah nak ung a ge ah ka om khai a kya ah hlo ah gaa gui ah hngu ah ka mät hteit ne ka ng’tuk vai ah phih a ge ah ka om ci nei ci ne pyien ciah kya ki. a cun ah a pyein ah a ngoi ung cäicat vai aung ah ga lam ah ka gui noh kä ng’tuk vai ah k’chü shä lo u hleih a cun kon ah Martin cu ga k’kap a kya nak ung ka no ng’düm ne m’shi nak Sacramentu khan tu ciah kya ki. A nupa phäi na gui am Khanpughü ah mong lam m’thei m’thang gui ne ta Pyinhtit Khaw Liguge ung Yahteih ah kyak tu k’ki. Christu kum phya k’thum lah k’chüihkipleiät ung (371) ung Tour maanggo ung Taigü mang tu mat ah kya lo ne a cun ung om ne Yahteih kyawng gui phih co ne Taigü gui am phih ca m’thei tu gui ciah kya ki. Bä ca Martin cu Christu kum phya thumkip lah kokipleik’chüh (397) ung shih ciah kya ki.

Reference: Life of Saints (Written by Seminarians (Pyin Oo Lwin)