Papa Shangpughang ah ng’thu Msgr. Andrea Ferrante no a m’thein kan a mong
Msgr. Andrea ferrante no Christu kum 2025, November k’cha a k’hngüp k’hma nak ung St. Peter Square ah a mi ng’bum nak a mi ng’päng lo lam ah Papa Shangpughang Leo no hteit ne ng’bum tu ci gui am m’va kho ka vai pyein ah mong cu ka ning m’thein tu ba gui hnging ah phäh ah a kya ka yei tu ci ne pyein ci. Papa Shangpughang no a pyein ah mong cu “ Phäi na nu be gui aw, Khom’dek ghunkho gui a hei hei ung ng’tukah nak gui ah phäh ah shi kyuk leim bai ne yai ca ci gui ka vai kei awn a täng ah na mi k’taigü tu peit gui vai ah ka ning chüthäm gui ci. A k’tung pi ah m’va kho ka vai ng’ngahtüh ne ghunkho ng’phei ng’et gui no m’va kho kä na mi k’hmih ein vail ah k’chang täng täng m’gein ah hlü ciah gunghtot nak gui na mi gänap peit takt u gui vai ka ni k’nga k’phlang tu gui ci. Boi Yesu Christu ci mi mi gui ah ng’ngaih u nak ah kya ci. Boi Yesu shih nak ung ka no a ghünlo ba nak ah poi cu mi mi gui ah a k’hngüp täi ghünlu am ng’ngaihäp nak na pe gui ci.
Ka m’hngi gui ah phäi na nu be gui aw, ngoi shen! ci ne nang mi gui a van ka ning do gui ci. Boi Yesu a ghün lo ba nak thähla nak cu ngoiä chüt hnguh shüm lä vai a ng’däih kyom tu pi ci. yeikyai vai ah ni tu pi ci lah cäicat vai ah kya tu pi ciah ng’thu k’thai ah kya ci. A cun ah mong cu kat nak ah k’khan ah m’hngi nak ci ah aungtang nak lah shih nak ah k’khan ah hngun ghün nak ci ah aung tang nak m’dang ciah a k’tung pi ah ng’thu k’ni ah kya ne mi mi gui ah m’lung ngaih yai ca hlak gui ciah phäh ah hlü ci gui na k’be gui hnging khai ah kya ci. Boi Yesu Christu ah ghünlo nak ba ah thûk ciah mong mi ng’ngahtüh ung mi mi gui ah mi coigha nak a mong a í hok cha ci ah ng’ phlan ci cu mi hnguh hnging khai ah kya ci. Mi mi gui ah dídam loi ciah k’chang ah mi kya nak ung Paschal thähla nak cu mi mät ah mong lam lah kho m’dek pum ung kyühkyok vai gui buiawt nak ung ka no m’thei m’hta nak, m’gein m’hleih nak lah k’tha om ciah ng’ngaihu nak ah kya lo ci.
Boi Yesu a ghün lo ba nak ung ka no teng ah a kya ung Yaica Buitawt nak ah lam cu a k’khang nak ah lam ah ng’thong hlat lo ciah kya ci. Boi Yeisu kä ghün lo ba A kya thüi hlei ne m’neh m’oh nak a ng’päng ung yeikyai nak om khai ci cu mi ng’ngahtüh vai hlü ci. Ester ci ah Boi Yesu ah shih nak m’chüt ne a ghün lo ba nak no shing m’kang k’tung cu kä k’hlet ein ne mi mi k’chang gui ah ngoiä hnguh shimlä vai ah mong gui a ng’thong hlat hlak ciah cäicat vai ah ng’tukah nak ung ng’näng nak gah ciah kya ci. Boi Yesu ah ghünlo ba nak cu ng’ngahtüh nak tumat, Theory tumat düt ah kä kya ne yum nak ah a ng’yung ah kya ci ah buiawt nak tumat ah kya ci. A ni cu Htitheing ca Muh awn shi nak m’chüt ne ghüng lo ba ci ah kya hleih mi mi gui a ng’däih ah na m’cäi gui ciah kya ci. Paschal ng’ngaih u nak cu m’lung a ng’kyak vai ah kä kya ci. Mi mi gui ah a k’hngüp täi mi ghünlu ung cang ciah yum nak a om vai vai ah mi k’tha nak vail ah Christian ng’ngaih u nak ah hngiphngäi ne m’hteng ciah k’tha awn kho m’dek ng’thong hlat khai ah mi ci hnging vai ah kya ci.
Papa Shangpughang Leo XIV ka vai k’däih ne mi k’taigü pe ne Pa Khanpughi no Mi mät ah ghunkho lah khom’dek pum ung dìmkyäp nak a om vai ah ng’hta ng’ko ni vail ah ng’gei ng’cam nak a om lo pi hti vai ah ät ciah m’lung awn ät ne bi a mi bi hnging vai ah k’tha gui lah k’tha m’hteng nak a na peit gui vai ah mi shang ko
Msgr. Andrea ferrante
Chargè d’ Affaires a.i.
Apostolic Nunciature in Myanmar
