Papa Shangpughang ah ng’thu
Yum nak a hei hei gui awm ng’hta ng’ko ne kya ciah Papa Shangpughang Leo no yum nak lam gui ung a m’thei m’cäi nak ung a pyein cu kho m’dek ni lo pi hti khai ah pyantham nak ung kä tang ciah yum nak gui awn a í hok cha a tang ah bi loh hnging vai ci ah lam shüm ne Juu Cahtolik ng’hta ng’ko nak phih hlü ci ci cu m’shüm ciah kya ci. Ghunkho lam lah a m’shah kätaga ci gui no ng’hnguh ng’hmat ne ng’khot ng’gei vai ah lam a k’kheing vai ah kä ci ein vai. Kä tang ein ciah Kho kum k’chuk ung yum nak a hei hei gui no a täng ah bi püi gui vang ng’ngahtüh ba ung bi hnging ah kya ci. Mi mi gui ah kho m’dek cu a yan ung ka ta ät lo lei lei ne m’hngi ng’gei nak lah a täng ah ät ne bi loh lo hnging pi hti vai ah hlü ci.
K’chang gui ah yaica buiawt nak gui a ken lo vai ah bi vail ah mi ng’dü im kho m’dek mi m’htei vai ah mi gunghtot vai, cang lam, k’chü m’gein nak, ng’kot ng’gei ba nak, taga nak lah dìmgei nak gui a om vai ah m’thei m’thang gui ne k’chang gui ka vai, a ng’hloi vai ah bi bi peit gui vai, yum nak lam ung ng’hta ng’ko nak gui ung Khanpughi ah ng’ming a kho lä ah ng’ming pha nak gui cu ng’ngaih nak vai ah bi vai ci ci. Mi mi gui ah yum nak gui cu k’chang gui ah m’lung dìmkyäp nak a om lo vai ah mi leng vai ah kya ci. Mi mi gui cu mi mät ah ghünlu gui, Mi k’kyawng khui gui, Mi om nak ah mi phei ng’leng, mi piggo, mi ghunkho lah mi om nak ah mi ng’düim khom’dek ka vai ah ng’ngaiu nak awn mi pyantham ba khai ah kya ci. A cun ah kya hleih mi yum nak a hei hei awn ät ne mi bi ung a í phih mi m’chüt khai. A cun ah a kya ung a í no mi mi gui kä na m’cha ng’lang gui hnging khai ci ne Papa Shangpughang no pyein ci.
