Papa Shangpughang ah ng’thu

Papa Shangpughang no Pharisius lah ngui k’phanm lok ah k’taigü nak m’tu m’täng ne a m’thei m’cäi nak ung  Khanpughi awn ng’hta ng’ko ne k’taigü nak ung m’lung m’yo m’nem ne cang ciah m’lung k’ni a om vai ah yum tu k’chang gui a van chü thäm gui ah kya ci. Pharisius no a k’taigü cu ng’ müi m’cha lam ah a m’lung m’däm ne a bi loh om k’ih gui ah phäh ah khäh ghah cu a k’tung pi ah m’dang ci. Läk lam gui a k’ni ah a lä gui cu ng’dam tu lang pang hleih phih k’chang gui ah khan ah, gän ap peit tak nak kä om ne m’hngi yei nak ung du ciah kya hleih a ni cu k’chü m’gein nak kä om ciah kya ci. A cun awn ng’hngu ng’tuk ciah ngui pham k’lok ah k’taigü cu Khanpughi ah ni bä nak ah phä ah m’tam ne a mät ah kat gui a mong ah phäh ah a k’ni ah ng’yu ng’yon ba ne k’taigü ci. A ng’müi ca ah ni bä nak vai ah a mät hta  phaya kyawng ah htei ne ni k’she m’cha ng’leng khai ah Khanpughi ah maa ah htei ne a kat gui a k’ni ah phleh ci.

Mät ah ni bä nak gui m’dang ne kat nak gui thuh thong vai kä kya ein hleih mät no mät ah kä ni nak gui hmat ne m’lung theing awn Khanpughi ah ma phih kyai, k’chang gui ah maa phih kya cang ne hti ciah m’lung cu a om vai hlü ci. Bä ciah Augustine ah ng’thu cu pyein ba ne Pharisius ah a m’lung a m’däm nak ah phäh ah a k’hmaleim gui thup ne k’chang k’pyam ah a kya lah a hmaleim m’dang ciah a m’lung m’yo m’nem ciah ngui pham k’lok ung ngui k’pham lok ci cu a k’hma m’dang hleih Khanpugi no a m’tui m’hleih peit a phäh ah gai ba ne a im ah a hteih ba ciah kya ci ci ne pyein ci. A cun ah kya hleih ngui pham k’lok ah hlo ah Khanpughi ah ma ah kä ng’aa ein ne m’lung k’hti awn kat nak gui m’dang ne ng’hngui ng’pa ba vai kä kyüh ein ne m’lung m’yo m’nem nak awn m’dang ah a kya ung a cun ah m’lung m’yo m’nem nak no mi mi gui ah m’lung na m’gei gui ne mi mi gui ung Khanmopi ghunkho a ng’shong lo vai ah phih na k’chü k’nga gui khai ci ne Papa Shangpughang Leo no Pyein ciah kya ci.