Hngun Pe ca Bawi
Bawi Yeisu Khanmopi-ah akai ba kon-ah ahlu läk ng’shä gui cuh ng’thu k’ni ami shä-ung k’chang gui noh läk neh ami ngon gui vai kyü u neh im k’kyong-ah shoh-awn ng’üng neh ng’thup ci gui. Bawi noh a m’cäi gui ghüt-ah ma mong gui cun phih bi hlü ci-ah m’lung lei cuh ngami-ung ak’be om ci.
Ngami noh Bawi-ah m’cäi gui ghüt-ah ci-ah a shüng hta k’äih vai neh pong ci gui. Hlu läk ng’shä gui cuh a hngei hlu läk ng’shä gui-awn a täng-ah im k’kyong-ah ng’bum hta neh suh shang ci gui. Nu Maria cun phih ngami-awn atäng-ah om tu ci. Ngami noh Judah-ah hngün-ung Mathia cuh m’thon neh k’hmawh ba ci gui. Hti theing ca muh Khanpughü a kyum lo vai-ah phih k’tai gü ci gui. Kho k’hngüp gha be lo hleih ng’hngum neh ng’tum ca kho k’chi cuh ami om nak om k’kyong-ah ng’ya lo ci gui. Mei m’lei hta gui cuh ngami-ah tumat hti-ah k’khan-ah kyum lo ci. Cun cuh Hti theing ca Muh Khanpughü-ah kia ci. Cum kon lei-ah ngami cuh ami kyä hla ami m’neh vai, ami shih vai cuh kä kyüh kyok lo ba ci. Hti theing ca ng’thu k’ni gui cuh ami m’thei m’kan gui-ah age-ah ng’pyang lo ci gui.
Hlu läk ng’shä gui cuh ng’thu k’ni leng neh m’thei m’kan nak bi lo ci gui. Hnguh ng’ya tu ci gui noh phih cäi cat neh ng’ngai tu ci gui. Ngami-ung -ah ak’da tuba cuh Sinai m’htung k’khan-ah k’Khanpughü noh m’cäi nak gui a peit-ah poi-ah caä Esarael pakhui k’chang gui-ah Shapok poi-ah phäh Jeruselem mang go-ah gok lo tu ci-ah Jew pakhui ng’pai gui-ah kia ci. K’chang ak’da cuh hlu läk ng’shä gui noh Creek, Latin, Arab k’chü gui lah a hngei ng’thu gui-awn ami m’thei m’kan tu gui cuh cäi cat neh ng’ngai tu ci gui. Hti theing ca Muh Khanpughü noh ngami-am ng’thu ahlü hlü pyein hnging ca bä nak cuh pe gui ci.
Cun-ah ng’thu ng’hta ak’khak ami pyein hnging cuh Hti Theing ca Muh Khanpughü-ah bi loh-ah akia-ah mong cuh Peteru noh k’chang gui-am m’thein gui ci. Peteru noh Bawi Yeisu cuh shih nak-ung ka noh a k’cang -ah aghün lo ba-ah mong lah gün kyo te-ah k’phyon ca Bawi-ah akia-ah mong cuh shä neh m’thei gui ci. Bawi-h shih nak-awn phyon nak lah m’shi nak Secramentu-awn Hti theing ca Muh Khanpughü-ah ni bä nak gui cuh gah tu ci gui.
Peteru noh am’thei m’kan kan gui-awn k’chang ak’da cuh ami m’lung ng’thong ng’hlat hleih cu k’hngüp-ung chang shing phya thum kyip m’shi nak Secramentu gah tu ci gui. Cun-ah hlo-ah Bawi Christu-ah yumtu m’bum cuh tün lo ci. Bawi yeisu sa ghün lo nak ba kho k’hngüp k’hma kyip be hleih Hti Theing ca Muh Khanpughü cuh hlu läk ng’shä gui-ah k’khan-ah kyum lo ci. Hti Theing ca muh Khanpughü-ah poi k’hngüp cuh yumtu ng’bum-ah ng’tüi tu nak-ah k’hngüp-ah kia ci.
